Kryedemokrati, Sali Berisha, në fund të protestës së sotme (20 shkurt), njoftoi se do të kishte një tjetër protestë kombëtare të radhës, por ai nuk përcaktoi një datë, duke sqaruar se do njoftohet në vijim.
Ai paralajmëroi se protesta kombëtare e radhës sipas tij do të jetë më e madhe dhe më e fuqishme.
Berisha akuzoi më tej Policinë e Shtetit për përdorimin e sasive të mëdha të gazit lotsjellës jo vetëm ndaj qytetarëve, por edhe ndaj xhamisë së Namazgjasë.
Gjithashtu ai i denoncoi edhe për përdorimin e gazit dhe sulmit ndaj selisë së PD-së nga uniformat blu, ndërsa i bëri thirrje Edi Ramës të heqë dorë ose do mbante përgjegjësi, sipas tij, për çdo sulm ndaj qytetarëve.
“Ne jemi kryengritës paqësorë, por ne nuk e tolerojmë sulmin ndaj selisë, bombolat dhe bombat ndaj selisë tonë., edhe një herë hiq dorë nga sulmi ndaj selisë së PD. Jemi të gatshëm nga mëngjesi deri në mesnatë siç e meriton. Por përshkallëzimi i sotëm tejkalon çdo lloj caku. Sot besimtarë myslimanë pas agjërimit dhe iftarit, Zoti ua pranoftë, janë kthyer në xhami pë të falur namazin dhe për të vazhduar lutjen, ndaj të gjithëfuqishmit, Allahut të madh, me qëllim që territori i xhamisë të mos përfshihet nga asnjë lloj përballje, forcat e kryengritësve të armatosur devijuan në rrugën tjetër, në krah të kundërt, por kjo nuk mjafton, banditë me uniformë, i kemi filmuar, do ua çojmë dhe juve, kanë hedhur bombola gazi e tymuese në kate të ndryshme të xhamisë kur besimtarët po faleshin. E mbushën xhaminë me gaz lotsjellës, Zoti i vraftë për këtë krim të shëmtuar, janë pasardhës të denjë të etërve të tyre barbarë”, u shpreh Berisha.
“Edhe një herë u bëj thirrje besimtarëve myslimanë të dënojnë këtë akt të shëmtuar dhe i garantoj se protesta jonë, kryengritja jonë paqësore nuk do ndalet. Por do bëjmë gjithçka që në territor të përjashtojmë çdo ballafaqim e kacafytje me kundërshtarin, vetëm që ata të mos prishin namazin. Sot i nxorën me gaz nga xhamia dhe ne i kemi filmuar. Sikur të ishin terroristë me uniformë po mbledhin qytetarë të pafajshëm pa pa asnjë lidhje me protestën dhe po mbushin komisariatet. Paralajmëroj Edi Ramën se do marrë ndëshkimin e merituar bashkë me të tjerët. U them edhe njëherë, koha juaj ka marrë fund, tani është koha e qytetarëve, e guximit të qytetarëve”, përfundoi ai.
