Kreu i PD, Sali Berisha, gjatë fjalës së tij në “Foltoren” me demokratët në Sukth, vijoi akuzat ndaj qeverisë, duke e cilësuar situatën në vend si kritike.
Berisha deklaroi se edhe ato pak investime që janë realizuar janë “rrugë kartoni dhe mure kartoni” që shemben, ndërsa akuzoi se shqiptarët nuk janë vjedhur kurrë më shumë se në këto vite.
Sipas Berishës, qeveria synon të ndryshojë ligjin për të mbrojtur veten nga aferat korruptive, duke e cilësuar këtë si “provokimin më të rëndë” ndaj qytetarëve.
Berisha: Edhe ato pak punime që janë bërë, janë rrugë kartoni, mure kartoni. Bien të gjitha. Rrugët shemben. Kurrë nuk janë vjedhur shqiptarët si në këto vite. Fryhen kontot bankare me qindra milionë, ndërsa të rinjtë marrin rrugët e dheut. Po bëhet përpjekje për ta lënë vendin pa opozitë. Pse jemi sot në pikën më kritike? Sepse para jush, para mbarë shqiptarëve, zëvendëskryeministrja është kapur në flagrancë me vjedhje – fillimisht me 50 milionë euro të tunelit të Llogarasë – por ajo nuk ishte asgjë. Të gjitha, sipas tij, në bashkëpunim me Edi Ramën.
Këta thonë se do të ndryshojnë ligjin për të mbrojtur veten nga vjedhjet që kanë bërë. Mesazhi i tyre është: do të vjedhim sa të mundemi. Nuk ka provokim më të rëndë. Ky është një akt armiqësor, kur mendon Shqipërinë që po tretet, të sëmurët që japin shpirt pa ilaçe, shkollat në rrënim – dhe këta bëjnë ligjin.
