Një përplasje e dhunshme mes dy grupeve shqiptare ka tronditur qendrën e Athinës, ku janë plagosur rëndë me thikë tre persona, ndërsa janë arrestuar 26 të tjerë.
Sipas mediave greke, dy grupet u përleshën në zonën e Kato Patisias. Ata ishin të armatosur me thika, shkopinj, leva dhe grushte hekuri, ndërsa përplasja është përshkruar si e organizuar me taktika të strukturuara.
Policia greke njoftoi se 26 persona, anëtarë të dy grupeve rivale, u arrestuan nga strukturat e Sigurisë së Athinës. Tre prej tyre përfunduan në spital në gjendje të rëndë, pasi u goditën me thikë në pjesën e gjoksit, pranë zemrës.
Pamjet e kamerave të sigurisë treguan momentin kur një grup sulmon me thika dy persona, ndërsa dhjetëra kalimtarë shohin të tmerruar skenën e dhunës në mes të rrugës.
Sipas dëshmive të dhëna nga të arrestuarit, konflikti fillimisht dyshohet të ketë nisur për shkak të një vajze. Megjithatë, autoritetet greke kanë indicie të forta se pas përleshjes fshihet rivaliteti për kontrollin e trafikut të drogës në zonë.
Gjatë kontrolleve në banesat e të dyshuarve, policia sekuestroi 97 gramë kanabis të papërpunuar, 52 gramë kokainë, 51 gramë metamfetaminë, 6 thika si dhe një peshore elektronike precize, që dyshohet se përdorej për ndarjen e lëndëve narkotike.
Hetimet vijojnë për të zbardhur plotësisht rrethanat e ngjarjes dhe rolin e secilit prej të arrestuarve.
