Debatet e brendshme në Partinë Demokratike për bojkotin e komisioneve për Reformën Territoriale dhe Zgjedhore kanë përfunduar me një kthesë të rëndësishme: deputetët e opozitës kanë detyruar Sali Berishën të tërhiqet, duke vendosur që PD të marrë pjesë në proceset parlamentare për të dyja reformat.
Luçiano Boçi, bashkëkryetar i Komisionit të Reformës Territoriale, deklaroi se pas diskutimeve në kryesinë e vogël, PD do të vijojë të jetë pjesë e komisioneve. “Ne nuk e bojkotojmë komisionin. Do njoftojmë për gatishmërinë e grupit të PD për të bashkëvijuar këtë reformë që është e rëndësishme. Në grup parlamentar diskutojmë në mënyrë demokratike; pati mendime për braktisje, por Komisioni më i rëndësishëm është Komisioni i Mandateve. Duhet të ketë një dalje konsensuale, përndryshe procesi do të ishte i paravendosur”, tha Boçi.
Deputeti Bledjon Nallbati gjithashtu i doli kundër linjës së Berishës, duke argumentuar se bojkotimi i komisioneve të rëndësishme është kundër interesit të qytetarëve. “Jemi si filmi ‘Dy herë mat, edhe akullore edhe çokollatë’. Shkojmë në parlament, nuk shkojmë në dy komisionet më të rëndësishme. Duhet të shkojmë për të shpalosur opsionin tonë për qytetarët dhe më pas, nëse duhet, të vendosim për greva ose masa të tjera. Nuk shkon të bojkotojmë vetëm reformat”, tha Nallbati.
Deputeti Tritan Shehu theksoi gjithashtu se bojkoti nuk është zgjidhja në një kohë kur mazhoranca ka mbyllur çdo derë për opozitën. “Asnjë prej nesh nuk do bojkot, në kushtet kur mazhoranca ka mbyllur çdo derë dhe parlamentarizmi kërkon që të marrim qëndrime ekstreme. I takon kryesisë të vendosë”, u shpreh Shehu.
Eno Bozdo shtoi se pjesëmarrja e PD-së është e domosdoshme për të prezantuar pikëpamjet dhe për të sfiduar reformat e PS-së. “Që ata do bëjnë çfarë duan, kjo është e qartë, por ne duhet të shfrytëzojmë pjesëmarrjen tonë për të korrigjuar gabimet e tyre. Kemi ekspertizën dhe argumentet për ta sfiduar reformën. Nëse ata refuzojnë dhe vazhdojnë kokëfortësisht, atëherë mund të tërhiqemi”, deklaroi Bozdo.
Pas këtyre diskutimeve të tensionuara, kryesia e PD-së vendosi që partia të rikthehet në komisionet parlamentare për reformat territoriale dhe zgjedhore, duke shmangur një bojkot që do të dobësonte pozicionin e opozitës dhe ndikimin e saj në procesin e vendim-marrjes.
Debatet në mbledhjen e grupit
Eno Bozdo: Që ata do bëjnë çfarë duan ata, ne këtë e kemi të qartë, por ne duhet të shfrytëzojmë pjesëmarrjen tonë për të ‘grisur’ reformën që kanë bërë deri më sot. Kemi gjithë argumentet dhe ekspertizmin më të mirë për ta hedhur poshtë ç’ka ata kanë bërë. E dyta, me rëndësi, është modeli që ne propozojmë. Kjo çështje ka vëmendjen e publikut dhe të ndërkombëtarëve. Pastaj, në një çast të caktuar, nëse ata refuzojnë dhe ecin me kokëfortësi, ne mund të tërhiqemi.
Ina Zhupa: Nuk duhet ta lëmë hapësirën bosh në Komisionin e Reformës Territoriale. Pavarësisht nëse na dëgjojnë apo nuk na dëgjojnë, ne shkojmë për qytetarët dhe interesin publik. Të jemi aty për dëgjesat me ekspertët, për të dhënë zgjidhjet tona, që qytetarët të na dëgjojnë se si e duam ne reformën territoriale t’u shërbejë atyre. Ata do ta kenë më të vështirë të na kundërshtojnë, sepse nuk kanë argumente, por e kanë shumë të lehtë ta kalojnë pa ne, sepse thonë: ‘Ju nuk ishit’, dhe kështu janë rehat. Unë i kam pyetur qytetarët e zonave të mia dhe më thonë: merrni pjesë. Ju ftoj edhe të bëni një sondazh; do ju dali që thonë: merrni pjesë. Votat nuk i kemi, por e kemi zërin tonë aty dhe kjo do të ketë rezonancë si te qytetarët, ashtu edhe te ndërkombëtarët, duke bërë propozime konkrete. Ne duhet të jemi shumëdimensionalë: edhe protestat t’i bëjmë, edhe në reforma të jemi prezentë, edhe analizën, edhe zgjedhjet. Jemi parti me kapacitete njerëzore dhe intelektuale; nuk kemi pse të ndjekim vetëm një rrugë dhe të braktisim të tjerat.
Tritan Shehu: Asnjë prej nesh nuk do bojkot, në kushtet kur mazhoranca ka mbyllur çdo derë, dhe në këto kushte të parlamentarizmit detyrohesh të marrësh qëndrime ekstreme.
Bledjon Nallbati: Jemi bërë si filmi ‘Dy herë mat’, edhe akullore edhe çokollatë. Shkojmë në parlament, nuk shkojmë në dy komisionet më të rëndësishme. Nëse shkojmë me idenë që Edi Rama s’na jep asgjë, më mirë mos të shkojmë në parlament fare. Duhet të shkojmë të shpalosim atje opsionin tonë për qytetarët, pastaj, nëse zgjedhim variantin e bojkotit, të bojkotojmë çdo gjë, të shkojmë në grevë, në përshkallëzime më të mëdha. Nuk shkon të shkojmë në komisione të tjera e jo te reformat; duhet të ndajmë mendjen. /Pamfleti
