Qeveria shqiptare ka vënë në dispozicion mbi 5.4 milionë euro, ose rreth 520 milionë lekë, për blerjen e një prone në Londër që do të shërbejë si seli e re e Ambasadës së Republikës së Shqipërisë në Mbretërinë e Bashkuar.
Kjo lëvizje vjen vetëm pak ditë, pasi kryeministri Edi Rama pranoi se Shqipëria është dështim në shërbimin diplomatik.
“Ministria e Jashtme është si Televizioni Shqiptar, është një tjetër dështim i madh i yni. E ua thashë, e kam thënë dhe po ua them se nuk është një gjë që nuk e dimë, nuk është një institucion në funksion të gjithë këtyre sfidave. Nuk është. Pse? Sepse nuk është reformuar asnjëherë.
Edhe një ligj që u bë si reformë, nuk ishte reformë, ishte “tualet”, domethënë makijazh. Dhe ne nuk e kemi një shërbim diplomatik sot në lartësinë e sfidave të mëdha që ka bota dhe Shqipëria. Kështu që ligji duhet të jetë i tillë që të hapë rrugën për reformë, të hapë rrugën për të futur ajrin e pastër, për të futur njerëz të rinj.”-u shpreh Rama.
Sipas vendimit, procesi i blerjes së pronës do të realizohet nga Ministria për Evropën dhe Punët e Jashtme, në bashkëpunim me Ambasadën e Shqipërisë në Londër, të cilat do të përzgjedhin ndërtesën dhe truallin më të përshtatshëm për veprimtarinë diplomatike dhe konsullore.
Pronat që do të shqyrtohen duhet të plotësojnë disa kritere, përfshirë sigurinë, mungesën e problemeve ligjore dhe ofrimin e hapësirave të mjaftueshme për funksionimin normal të institucionit diplomatik.
Vlerësimi i ofertave do të kryhet nga një Komision i Posaçëm, ku do të marrin pjesë përfaqësues të Ministrisë së Ekonomisë dhe Inovacionit, Drejtorisë së Shërbimeve Qeveritare, Autoritetit Kombëtar për Sigurinë e Informacionit të Klasifikuar dhe Avokaturës së Shtetit. Ky komision do të shqyrtojë propozimet, do të ndjekë negociatat dhe do të përzgjedhë ofertën fituese.
Pas nënshkrimit të kontratës së shitblerjes, Ambasada do të kryejë pagesat dhe regjistrimin e pronës sipas legjislacionit britanik, ndërsa fondet do të mbulohen nga buxheti i Ministrisë për Evropën dhe Punët e Jashtme.
