Nga Boldnews.al
Kryeministri Edi Rama në një fjalim të shkurtër bëri lëvizje të madhe. I kujtoi Amerikës se Kina është e interesuar për “investime në Shqipëri”, madje vendi ynë kaq i vogël, i copëtuar nga batërdia e korrupsionit qeveritar dhe oligarkisë, qenka “pikë mjalti” dhe me interes të madh. “…po mos të ishte Shqipëria kaq e rëndësishme potencialisht, kinezët që janë civilizimi më i vjetër edhe tregtarët më të padiskutueshëm nuk do i kishin vënë syrin dhe nuk do e konsideroni Shqipërinë si “pikën e mjaltit” në gjithë Europën, apo jo?”, iu drejtua Rama me pyetje e sfidë njëkohësisht përfaqësuesit të një kompanie amerikane, për ta dëgjuar e dërguara me punë e SHBA-ve në Tiranë Nency Van Horn.
Diplomatja e SHBA-së, nuk shprehu asnjë reagim, duke ruajtur një ftohtësi të plotë, e cila u pa përgjatë gjithë takimit pasi protokolli qeveritar vendosi t’i ulte pranë me zëvendëkryeministren Belinda Balluku, personi për të cilën SPAK (që mbështet SHBA-ja) ka kërkuar autorizim për ta arrestuar për një sërë aferash të dyshuara në tenderat e infrastrukturës.
Rama dha dy mesazhe të forta. Së pari sfidoi SHBA-të në “gjeopolitikën” e tyre, duke kthyer sytë një herë nga Kina dhe së dyti u tregoi se sistemi i drejtësisë që ata mbështësin, pra SHBA-të, as mos e çojë në mendje që të afrohen në zyrën ngjitur të tij, zëvendëses Balluku.
Rama mendon se kjo lojë me qitje të largët është lëvizje politike e një “gjeniu”, por koha dhe ngjarjet kanë treguar se mbetet metodë e vjetër e liderëve autoritarë, që kur shohin në horizont fundin e tyre, kërcënojnë, herë haptas e herë me nënkuptime. Rasti i sotëm ishte më haptas se nënkuptimi. Me hedhjen e syve një herë nga Kina, lideri i vockërr po hap në mendjen e tij betejë të madhe, pa e kuptuar se tundja e atyre 83 mandateve (që dihet si i ka marrë) i treten në duar, qoftë edhe me një rresht qëndrimi nga ata përtej Atlantikut që me “DASH-(t)” i tregojnë edhe “Kinën motër”, (siç e quante kahera partia mëmë) e liderit të sotëm.
Kryeministri ynë ka lajthitje të frikshme në veprime, por në qëndrimet publike është i vëmendshëm, sidomos kur bëhet fjalë për deklarata të tilla të mirëmenduara. Përmendja e Kinës prej tij është qëllim, për të zbrazur edhe një nga tre fishekët e mbetur nga “pushka pesëshe” kundër “F16”… Arsyet e kësaj trimërie duhen parë tek frika!
Një vend anëtar I NATO-s, të cilën Rama e gjeti gati, në kushte të tilla nuk mund të flirtojë kaq haptas me Kinën apo Rusinë. Karremin mikro me grepin e vogël e hodhi. Peshqit e vegjël këtu tek ne e hëngrën, ndërsa ende nuk kupton se peshkaqenët e Oqeanit karremin e liderëve të vegjël vëtshpallur si “global”, e përdorin për kruajtëse dhëmbësh. Rraziku mbetet i madh për vendin, por Rama duket se Kinën nuk ka vetëm si kërcënim për të kërkuar “marrje me të mirë”, por formë për të treguar se është Zot në këtë vend. Rama sot ishte në Tropojë, por i ra nga Kina!
