Kryeministri Edi Rama, ka folur sërish ditën e sotme në lidhje me përmbytjet masive që u shkaktuan në vend, si pasojë e motit të keq.
Në podkastin e tij “Flasim”, edhe këtë herë Rama i cilësoi përmbytjet si një fenomen natyror që ndodh kudo në botë, teksa u shpreh se sipas tij vendi e ka përballuar më së miri situatën dhe për këtë gjë ndjehet krenar.
Edhe pse gjysma e popullit ndodhet prej disa ditësh në ujë, Rama thotë se shteti sipas tij është në gjendje ti përballojë situatat emergjente dhe shkak për përmbytjen janë ndryshimet klimatike, jo hidrovoret apo sistemet e kanalizimit jashtë funksionit.
“Nuk ka prekur vetëm vendin tonë, të paktën jo për arsyet që ziejnë tenxheret mediatike por një hartë të gjerë, deri në Stamboll ku kishte pamje apokaliptike.
Një masë ajri e ftohtë nga veriu është përplasur me një valë të ngrohtë nga Mesdheu që ka sjellë këtë situatë. Ndryshimi klimatik nuk do të thotë vetëm verëra të nxehta, por edhe stinë të pa qendrueshme dhe mot këmbëngulës. Më shumë zjarre dhe përmbytje, është tashmë një kuadrat i ri i klimës ku jetojmë, por jam krenar që në çdo situatë emergjence jemi më të përgatitur falë investimeve të bëra”, është shprehur Rama.
