Është mbyllur protesta e Partisë Demokratike e zhvilluar mbrëmjen e sotme para Kryeministrisë, ku kreu i PD-së, Sali Berisha, mbajti një fjalim të gjatë para mbështetësve të tij, duke bërë thirrje për mobilizim kombëtar dhe përshkallëzim të qëndresës ndaj qeverisë.
Berisha shpalli se protesta e radhës do të zhvillohet më 22 dhjetor, duke e cilësuar si “protestën e përgjithshme kombëtare për rrëzimin e qeverisë”, ndërsa bëri thirrje që opozita të përgatitet për tri javë qëndresë të pandërprerë.
“Pra data 22 është data e protestës së përgjithshme kombëtare, data në të cilën rrugët e Tiranës do ushtojnë “Largohu hajdut se koha jote ka marrë fund!”.
Ju garantoj se PD do bëjë gjithçka për frontin më të gjerë të mundshëm në këtë betejë. Ju garantoj se PD do përdorë të gjitha format e qëndresës, të gjitha format e rezistencës deri në largimin e tij.
Cila është më e mira për ne? Zënia për tre javë e këtij sheshi, kjo është, këtu duhet të betohemi ne, të vijnë këtu për të shpëtuar të ardhmen e tyre, familjen e tyre, vendin e tyre”, tha Berisha mes të tjerash para mbështetësve të tij.
