Këshilltari për Çështjet Ekonomike në Partinë Demokratike, Dorjan Teliti, ka reaguar ashpër ndaj të dhënave të fundit të publikuara nga INSTAT, sipas të cilave 40.5% e qytetarëve shqiptarë ndodhen në rrezik varfërie ose përjashtimi social.
Në një postim të publikuar në rrjetet sociale, Teliti e cilësoi këtë situatë si një pasqyrë të qartë të keqqeverisjes dhe mungesës së vizionit nga ana e qeverisë. Ai theksoi se varfëria dhe pabarazia nuk janë çështje fati, por rezultat i drejtpërdrejtë i abuzimit me fondet publike dhe politikave të dështuara ekonomike.
“Shqipëria ‘kampione’ e varfërisë, çdo gjë tjetër është thjesht propagandë,” shkruan Teliti.
Ai shton se në veri të vendit situata është edhe më dramatike, ku gati gjysma e familjeve nuk arrijnë të përballojnë nevojat bazike të jetesës.
Sipas tij, ndërsa një pakicë pasurohet në mënyrë të padrejtë, shumica e qytetarëve përballen çdo ditë me ankthin e faturave, mungesën e ushqimit të mjaftueshëm, vështirësitë në arsim dhe shëndetësi, si dhe pasigurinë për të ardhmen e fëmijëve të tyre.
Teliti bën thirrje për një ndryshim rrënjësor në mënyrën e qeverisjes: “Nevojitet një shtet që punon për qytetarët, jo kundër tyre. Shqipëria nuk e meriton këtë gjendje varfërie, përkundrazi, ajo ka potencialin për më shumë.”
