Nga Boldnews.al
Gjykata Kushtetuese i bllokoi Presidentit dekretin për zgjedhjet e parakohshme lokale në Tiranë, duke e vendosur Bajram Begaj në një pozicion qesharak dhe shkelës flagrant të Kushtetutës.
Begaj tha që ai dekretoi zgjedhjet në Tiranë me sugjerimin e këshilltarit ligjor, duke iu referuar Ilir Rusmalit. Për këtë sugjerim, Rusmali mori vlerësime të larta publike edhe nga kryeministri Edi Rama.
Por, anëtarët e Kushtetueses, unanimisht, e pezulluan dekretin, duke nxjerrë bllof njëkohësisht “propozuesin” Rusmali, shefi e tij administrativ, Bajram Begaj dhe shefin politik të të dyve, Edi Ramën.
Situata e krijuar me dekretin ishte absurde. Këshilli i Ministrave shkarkoi kryebashkiakun e arrestuar të Tiranës, Erion Veliaj, pasi më herët, Këshilli Bashkiak konstatoi në fund të Shtatorit se ai mungon në punë “më shumë se tre muaj”, prej 10 shkurtit 2025, kur u vendos në paraburgim për korrupsion dhe pastrim parash.
Veliaj e ankimoi vendimin e shkarkimit në Gjykatën Kushtetuese. Me këtë ankim, u aktivizua menjëherë neni 115 i Kushtetutës, që pezullon shkarkimin.
Por presidenti Begaj, nën nxitjen e kryeministrit Rama, nxori dekretin për zgjedhjet e reja lokale në Tiranë për në 9 nëntor, megjithëse, sipas Kushtetutës, Veliaj është ende formalisht në detyrë.
Roli i Rusmalit
Me dekretimin e zgjedhjeve, Presidenti Bajram Begaj gjendet tërësisht në shkelje të Kushtetutës. Ai e vendosi veten në këtë pozitë e vullnet të plotë politik.
Ndërkohë, pas tij, Ilir Rusmali, njeriu që mori edhe “dekoratën publike” për “pavarësinë intelektuale” nga Rama, duket se kishte më shumë se një arsye për të hequr qafe dhe sa më shpejt Erion Veliajn nga jeta politike.
Rusmali, dikur një ish-ministër në qeverinë “Berisha”, kaloi ylberin politik dhe tashmë është përfaqësues i Partisë Socialiste në strukturat qendrore të zgjedhjeve, krahas rolit si krye-këshilltar ligjor i Bajram Begaj.
Pavarësisht kësaj afërsie të fortë politike me qeverinë, “Boldnews” mëson së Rusmali nuk arriti të siguronte një leje ndërtimi nga Erion Veliaj, e cila do t”i shërbente për forcimin e mëtejshëm të financave personale.
Refuzimi i lejeve të ndërtimit
Rusmali zotëron një banesë, e lidhur strukturalisht me disa të tjera, në një zonë diku lart Liceut Artistik në Tiranë, një hapësirë shumë e lakmuar për ndërtime të larta me vlera të konsiderueshme.
“Boldnews.al” ka mësuar se Rusmali ka nënshkruar të paktën dy kontrata me sipërmarrës të ndryshëm për zhvillimin e pronës së tij, për të ngritur godina shumë-katëshe. Por, në të dy rastet, Erion Veliaj, në cilësinë e kryetarit të Bashkisë, ka refuzuar miratimin e lejeve të ndërtimit.
Për momentin është e paqartë se përse Veliaj, i cili konsiderohet si “rekordmen i betonizimit” të Tiranës, me miratimin e miliona katrorë ndërtime, ka refuzuar aplikimet për pronën e Rusmalit.
Megjithatë, duket se Ilir Rusmali ka ruajtur “hakmarrjen e ftohtë” për Veliajn dhe tentoi t’ia shpaguajë injorimin e lejeve të ndërtimit, duke “sugjeruar” zhvillimin e zgjedhjeve të reja në Tiranë, pavarësisht se Veliaj është ende “de jure” në detyrë.
“Hakmarrja” e Rusmalit futi në qorrsokak edhe shefin e tij, Presidentin e Republikës. Ky i fundit, pas marrjes së porosisë politike nga Rama, i besoi instiktit profesional të këshilltarit të tij ligjor.
Por, këshilltari ligjor, ka pasur hall tjetër me Veliajn duke përdorur Bajramin, i cili me një verbëri politike, u keqpërdor, si nga Rama, ashtu edhe nga Rusmali.
Po prona? Burime të sigurta për “Boldnews.al” thonë se tashmë Ilir Rusmali po pret një viston nga Këshilli Kombëtar i Territorit (KKT), i drejtuar nga Edi Rama.
KKT-ja e Ramës miraton leje për kulla, ç’ka sugjeron që refuzimi i Veliajt për leje ndërtimi pallati, mund t’i dalë më për hajër Rusmalit, pasi mund të pajiset me leje kulle nga kryeministri.
Nëse ndodh kështu, Bajram Begaj do ta kuptojë se si u përdor nga këshilltari i tij më i ngushtë.
