Nga Boldnews.al
Kryeministri Edi Rama, nëpërmjet Sekretarit të tij të Përgjithshëm, Ëngjëll Agaçi, njoftoi Presidentin e Republikës, Bajram Begaj, për shpalljen e vakancën në Bashkinë e Tiranës, pasi Këshilli i Ministrave miratoi më herët shkarkimin e kryebashkiakut të arrestuar, Erion Veliajt, me argumentin e “mungesës 3-mujore në detyrë”.
Në shkresën e firmosur në 30 Shtator 2025, Këshilli i Ministrave informon kreun e Shtetit për shpalljen e vakancave edhe në 5 bashki të tjera.
Bashkitë e Beratit, Tepelenës dhe Matit kanë mbetur pa kryetar, pasi drejtuesit e tyre, Ervin Demo, Tërmet Peçi dhe Agron Malaj, u zgjodhën deputet në zgjedhjet parlamentare të 11 Majit.
Bashkia e Cërrikut ka mbetur pa kryetar, pasi drejtuesi i saj, Andis Salla, u emërua Ministër i Bujqësisë. Ndërsa Bashkia e Vlorës pritet të shkojë në zgjedhje të parakohshme, pas dorëheqjes së kryetarit Ermal Dredha.
Në njoftimin e Këshillit të Ministrave, pika më delikate është vakanca për Bashkinë e Tiranës.
Qeveria, nën drejtimin e Edi Ramës, vendosi në 25 Shtator 2025 të miratojë propozimin e Këshillit Bashkiak të Tiranës për shkarkimin e Veliajt. Vendimi i firmosur nga vetë Rama hyri në fuqi një ditë më pas, në 26 shtator, pas botimit në Fletore Zyrtare.
Përplasja Rama-Veliaj
Vetëm tre ditë më vonë, Erion Veliaj nga paraburgimi i Durrësit, nëpërmjet avokatëve të tij, dorëzoi ankim në Gjykatën Kushtetuese, ku kërkon shfuqizimin e vendimit të miratuar nga ish-mentori i tij politik, Edi Rama.
Në ankimin e tij, Veliaj pretendon se vendimi i qeverisë është marrë në kundërshtim me Kushtetutën. Sipas tij, ai nuk ka munguar pa arsye në detyrë për më shumë se 3 muaj, por se kjo ka ardhur si pasojë e vendimit të Gjykatës së Posaçme, që ka caktuar ndaj tij “arrest me burg”, nën akuzat për korrupsion dhe pastrim parash.
Veliaj thotë gjithashtu se nuk rezulton që Këshilli Bashkiak apo Këshilli i Ministrave të kenë konstatuar shkelje të rëndë disiplinore në aktivitetin e tij institucional dhe se vijon të jetë i pafajshëm, për sa kohë nuk ka një vendim dënimi të formës së prerë.
Ankimi i Veliajt aktivizon menjëherë nenin 115, pika 2 e Kushtetutës, i cili parashikon: “Organi i shpërndarë ose i shkarkuar (i njësisë së qeverisjes vendore) mund të ankohet në Gjykatën Kushtetuese brenda 15 ditëve, dhe në këtë rast vendimi i Këshillit të Ministrave pezullohet”.
Tashmë, ankimi i Veliajt ka hyrë në procedurë gjyqësore, pasi Gjykata Kushtetuese ka administruar kërkesën e tij dhe përcaktoi edhe relatorin e çështjes, në një mbledhje të zhvilluar të hënën e kësaj jave.
Pas administrimit dhe regjistrimit të ankimit, procedura të zëvendësimin e Veliajt pezullohet automatikisht, sipas përcaktimeve kushtetuese.
Por, kjo lëvizje e Erion Veliajt duket se i ka prishur parashikimet kryeministrit Edi Rama, i cili njoftoi nga Asambleja e Partisë Socialiste se kandidatja e tij për zgjedhjet e parakohshme në Tiranë është Ogerta Manastirliu.
Madje, Rama caktoi edhe zëvendësen e tij, Belinda Balluku, për të udhëhequr fushatën elektorale të Manastirliut. Por, ankimi i Veliajt në Kushtetuese, logjikisht duhet të pezullojë fushatën dhe planet e Ramës për të vendosur shpejt Manastirliun në krye të qytetit të Tiranës.
Topi në fushën e Presidentit Begaj
Megjithatë, Rama nuk duket se heq dorë nga strategjia e tij. Ai ka vendosur të shfrytëzojë “gjeneral” Bajram Begaj, i cili është shndërruar në “ushtar” të kryeministrit, sapo ky e emëroi në krye të Shtetit.
Tashmë mbetet për t’u parë nëse Begaj do të dekretojë datën e re të zgjedhjeve për Bashkinë e Tiranës. Në rast se bën diçka të tillë, ndërkohë që ankimi i Erion Veliajt është në shqyrtim në Gjykatën Kushtetuese, atëherë Presidenti mund të shndërrohet vetë në subjekt të shkeljes kushtetuese dhe, rrjedhimisht, edhe subjekt i shkarkimit nga detyra.
