Analisti Ben Andoni komentoi zgjedhjet e 11 Majit 2025.
Ai tha se është problematik fakti, që liderët politikë nuk janë përballur në një debat publik. Sipas tij, premtimet e partive politike janë larg realitetit shqiptar.
“Është problematik fakti që liderët politikë nuk janë përballur në një debat publik. Në Shqipëri po largohet rinia dhe po ikën gjithashtu edhe inteligjenca. Po zvogëlohet shumë baza e kontribuesve. Publiku duket se është “ftohur” me politikanët. Premtimet elektorale janë tepër larg realitetit. Partitë tona kanë humbur sensin e realitetit. Arlind Qori duket disi më i saktë sepse shtyllat e programit të vet bazohen në ideologji. Publiku në vendet e lindjes, nuk proteston shumë. Dhe kur protestohet, nuk arrihet diçka, sepse në protestë duhet vendosmëri. Te protestat në Serbi, unë kam mësuar se pedagogët janë paguar me vetëm 50 euro në një muaj, pasi dolën në demonstrata. Kështu, protesta u fashit, sepse qytetarët, edhe intelektualët do të jetojnë. Kështu ndodh edhe tek ne. Dikur mbështetja amerikane ka qenë gati një oksigjen. Amerika ishte thuajse Zoti në tokë më herët. Tek Amerika, me mënyrën sesi sillet me demokracinë e vet, njerëzit kanë humbur besimin për rregullat e lojës. Ka gati 2 vite, që në Shqipëri nuk ka ambasador amerikan”, tha Andoni.
Duke folur për ngërçin e krijuar në Kosovë, Andoni theksoi se politika e Kosovës duhet të tregojë më shumë pjekuri.
“Politika e Kosovës duhet të tregonte pjekuri. Edhe emri i Albulena Haxhiut është shumë i diskutuar. Kur ajo ishte ministre, njerëzit e UÇK-së kanë marrë pak para, gjatë kohës kur ishte ministre, dyshohet se i janë zhdukur provat vrasjes së Deharit. Ta sjellësh tetë herë emrin e Albulena Haxhiut, është kokëfortësi e madhe. Është krijuar një ngërç dhe Vetëvendosje kërkon të jetë në qeveri. Unë jam i sigurt që tek LDK do piratohen për të dhënë mbështetje dhe flitet për 4 vota nga Lista Serbe. Kurti ka në kokë edhe Nismën. Mendoj se Kosova do jetë në ngërç deri në zgjedhjen e presidentit të ri. Deklaratat e Albin Kurtit e kanë penguar atë”, deklaroi Andoni i ftuar në studion e News 24.
