Kryeministri Edi Rama ka sulmuar sërish SPAK për arrestimin e kryebashkiakut të Tiranës Erion Veliaj, ku tha se një drejtësi e çalë dhe shpërfillëse, mund të kthehet në rrezik.
Në rubrikën ‘Sy m’Sy’ në Facebook, Rama u shpreh se “pavarësia më duket se është shalqi me provë kur thotë populli”, duke shtuar se “qartësisht burimi i një vetëbesimi të SPAK dhe GJKKO”.
Ndërsa më tej, kryeministri u shpreh se nëse abuzohet me pavarësinë e pushtetit të drejtësisë, atëherë do të ndërhyhet.
“Tani që pavarësia më duket se është shalqi me provë kur thotë populli, por qartësisht burimi i një vetëbesimi të SPAK dhe GJKKO, ne do të flasim për forcimin e demokracisë sa herë që nga drejtësia të shkelen këto standarde. Një drejtësi e pavarur, por e çalë profesionalisht dhe shpërfillëse ndaj lirive e të drejtave kushtetuese, dhe ndaj ndarjes kushtetuese të pushteteve madje, mund të kthehet në kërcënim për vetë demokracinë, problem për shoqërinë dhe pengesë për ekonominë.
Nëse ka shenja që thonë që abuzimi me pavarësinë e pushtetit të drejtësisë mund të bëhet një rrugë pasigurie juridike në trupin e shoqërisë problemi nuk është më thjesht i atyre që keqtrajtohen direkt nga një pushtet që fryhet me vetveten por është një problem për vendin e shoqërinë, si i tillë është për mua si kryeministër, jo që ta sulmojnë, por ta ndihmojnë drejtësinë të konsolidohet”, deklaroi Rama.
