E ardhmja politike e Kosovës, vijon të mbetet e paqartë pas numërimit të votave të rregullta të zgjedhjeve të përgjithshme të së dielës. Partia Vetëvendosje e Albin Kurtit, prin me 40.83 përqind të votave, e ndjekur nga PDK me 22.5 përqind, LDK 17.59 dhe AAK me 7.46 perqind. Por pa përfshirë votat e diasporës dhe ato me kusht, numërimi i të cilave nuk ka përfunduar ende, Vetëvendosje arrin të sigurojë vetëm 47 mandate nga 61 sa i nevojiten për të krijuar qeverinë.
Duke qenë se ka përjashtuar mundësinë e një koalicioni me partitë opozitare, Vetëvendosje I ka varur shpresat tek votat e diasporës, nga ku mund të sigurojë nga 2 deri në 4 mandate, në skenarin më optimist për Kurtin.
Rreth 105 mijë votues u regjistruan për të votuar jashtë Kosovës, dhe mbi 84 mijë e 500 zgjodhën të shfrytëzonin këtë të drejtë. Më herët kandidati për kryeministër i PDK, Bedri Hamza mbylli derën për një mundësi bashkëpunimi me Vetëvendosjen, ndërsa tha se opozita mund ta krijojë qeverinë.
Gjithashtu lideri i AAK-së Ramush Haradinaj, është shprehu i gatshëm të bashkëpunojë me partitë e tjera opozitare për të krijuar një qeveri kundër Kurtit.
Analistët parashikojnë se rezultoni parashikon kompromise dhe se mund të çojë drejt një qeveri jo të qëndrueshme. Ndërkohë, Komisioni Qendror i Zgjedhjeve në Kosovë njoftoi se të martën në qendrat komunale të numërimit nisi procesi i numërimit të votave të kandidatëve për deputetë.
Zëdhënësi Valmir Elezi, pohoi se pas përfundimit të këtyre procedurave, pra numërimit të votave jashtë Kosovës, votave me kusht, personave me nevoja të veçanta dhe aspekteve të tjera që parashikohen me ligjin për zgjedhjet KQZ do të shpallë rezultatet përfundimtare për subjektet politike dhe kandidatët për deputetë.
Ndërkohë Lista Serbe që ishte në gare me 5 parti të tjera nga radhët e komunitetit serb, për 10 ulëset e garantuara për këtë komunitetet, pretendon se i ka fituar të dhjetë vendet, edhe pse kjo mbetet ende e paqartë.
