Protesta qytetare kundër qeverisë u zhvillua edhe në ditën e saj të 55-të, ku qindra pjesëmarrës kërkuan largimin e kryeministrit Edi Rama dhe ndryshimin e klasës politike.
Një prej protestuesve komentoi deklaratat e kryeministrit të bëra gjatë mbledhjes së grupit parlamentar të Partisë Socialiste, duke e cilësuar atë si të pabesueshëm dhe duke kërkuar që të mbajë përgjegjësi për rastet e korrupsionit në administratë.
“Le t’i dorëzojë në burg të gjithë ata drejtorë ministrish që kanë vjedhur. Të përgjigjen para drejtësisë. Ramës nuk i zihet më besë. Kush kërkon besën, por nuk e mban, është i pabesë. Unë nuk i besoj më”, u shpreh qytetari.
Ai u ndal edhe te problemet me të cilat përballen qytetarët në përditshmëri, duke përmendur ndërprerjet e shpeshta të energjisë elektrike.
“Një shok nga jugu më tha se energjia elektrike ndërpritet deri në 20 herë në ditë dhe për pasojë po u dëmtohen pajisjet elektroshtëpiake”, tha ai.
