Policia ka dalë me një komunikatë të shkurtër për mediat në lidhje me vetëdorëzimin e një prej emrave më të njohur të grupeve kriminale në Qarkun e Durrësit, Kreshnik Farruku alias Kreshnik Budlla, i cili konsiderohet si klanit “Farruku”.
Autoritetet raportojnë se bashkë me Kreshnik Farrukun është vetëdorëzuar edhe vëllai i tij, Erneo Farruku, teksa të dy ishin shpallur në kërkim nga Italia. Autoritetet italiane i akuzojnë ata për veprat penale “Organizata kriminale” dhe “Trafikimi i lëndëve narkotike”.
“Specialistët për Hetimin e Narkotikëve të DVP Durrës bënë ekzekutimin e urdhrit të ndalimit për shtetasit K. B. alias K. F.(K.), 51 vjeç dhe E. F., 37 vjeç (vëllezër), të dy banues në Durrës, të shpallur në kërkim ndërkombëtar nga autoritetet italiane, për veprat penale “Organizata kriminale” dhe “Trafikimi i lëndëve narkotike”.
Këta 2 shtetas janë vetëdorëzuar në ambientet e Drejtorisë Vendore të Policisë Durrës. Në bashkëpunim me Interpol Romën, vijojnë procedurat për ekstradimin e tyre, në Itali.” – thuhet në njoftimin e Policisë.
Kreshnik Farruku alias Budlla dhe vëllai i tij, Erneo Farruku, janë vetëdorëzuar në Drejtorinë e Policisë së Durrësit, rreth orës 22:00 të mbrëmjes së djeshme, të shoqëruar nga avokati i tyre.
Kush është Kreshnik Farruku alias Kreshnik Budlla?
Kreshnik Farruku (Budlla) ka përdorur 10 emra për t’i shpëtuar drejtësisë, teksa në maj të vitit 2010, ai u arrestua së bashku me 7 anëtarë të tjerë të bandës në Barcelonë për trafik kokaine.
Në vitin 2014, Kreshnik Farruku u arratis nga burgu dhe u arrestua në vitin 2019 teksa kërkohej në Spanjë e Itali për trafik kokaine dhe vjedhje të disa banesave.
Ndërkohë, në vitin 2015, Kreshnik Farrukut (Budllës) iu bë një atentat në zonën e “Don Boskos” në Tiranë. Ai ishte në shoqërinë e kunatit të tij, Rinald Budlla, dhe të dy shokëve, kur u qëllua me armë zjarri, ndërsa u plagos një kalimtare.
Sipas medieve spanjolle Kreshnik Budlla dyshohej për vrasjen e bosit të tij në Spanjë, në vitin 2010, për shkak të pazareve të drogës, por më pas rezultoi se atentatin e kishte porositur Devi Kasmi, që u vra në një atentat në janar të 2018-ës në Tiranë.
Me vendim të Gjykatës së Posaçme, në muajin Dhjetor të vitit të kaluar, Kreshnik Budllës (Farrukut(, së bashku me vëllain e tij, Erneo Farruku iu konfiskuan 27 pasuri, më konkretisht disa prona në Tiranë dhe Durrës, apartamente në ndërtesa luksoze, automjete të markave “Mercedes Benz” dhe “Smart”, si dhe bizneset “Eco Energy System” dhe “Rrotull-Beton”. Pasuritë dyshohet se ishin vendosur nga aktiviteti i paligjshëm i trafikut të drogës.
Në vitin 2023 ai u shpall në kërkim ndërkombëtar dhe nga Spanja pas një megaoperacionit kundër trafikut ndërkombëtar të kokainës. Në atë kohë u kap 2 ton kokainë që dyshohet se ishte porositur nga klani Farruku në Ekuador dhe do të futej në Spanjë.
Gjithashtu, Kreshnik Farruku dilte edhe në dosjen e ish-deputetit socialist Jurgis Çyrbja, edhe pse SPAK nuk lëshoi asnjë masë ndaj tij.
Nga bisedat e transkriptuara nga aplikacioni “Sky Ecc” doli se ish-deputeti i jepte informacione sekret të shpallurit në kërkim Kreshnik Budllas. Çyrbja e informonte që të kontrollonte ambientin përreth banesës së tij, pasi kishte informacion se mund të ishte në vëzhgim nga punonjësit e Shërbimit Informativ
