Prokuroria e Posaçme (SPAK) ka shpallur moskompetencë në lidhje me kallëzimin e bërë nga Partia Demokratike në lidhje me dhunën e ushtruar nga Policia e Shtetit kundrejt protestuesve në tubimin e mbajtur nga opozita më 23 Dhjetor.
Në shkresën e firmosur nga kreu i SPAK, Altin Dumani theksohet se pas verifikimeve ka rezultuar se kallëzimi orinetohet në drejtim të veprave penale që nuk janë kompetencë e SPAK-ut dhe për këtë shkak ia ka dërguar për hetim Prokurorisë së Tiranës.
Partia Demokratike kishte kallëzuar drejtorin e Policisë së Tiranës dhe efektivët, ku pretendon se ata kanë ushtruar dhunë ndaj protestuesve gjatë tubimit për bllokimin e rrugëve në kryeqytet.
“…nga të dhënat e ofruara deri më tani konstatohet se orientohen në drejtim të veprave penale të parashikuara nga nenet 90, 248, 250, 251, 253, 261 të Kodit Penal.
Nëse pas verifikimeve apo hetimeve të kryera nga ana juaj, do të rezultojnë elementë të figurave të veprave penale të parashikuara nga neni 75/a i Kodit të Procedurës Penale, apo ku autorë të mundshëm të veprës penale, do të jenë subjekte për hetimin e të cilëve kompetente është Prokuroria e Posaçme Kundër Korrupsionit dhe Krimit të Organizuar, të na ridërgohen aktet e procedimit penal në fjalë.
Përsa më sipër, ju përcillet për kompetencë materiale kallëzimi i mësipërm, pas parasysh kompetencën lëndore dhe territoriale, në respektim të nenit 75/a, 76 dhe 28 të K.Pr.Penale.” thuhet në shkresën e Altin Dumanit.
