Dy persona janë arrestuar nga Policia e Krujës, pasi u kapën në flagrancë duke kultivuar bimë narkotike në fshatin Zgërdhesh.
Në pranga ranë Kastriot Bazja, 52 vjeç, dhe Astrit Seferi, 54 vjeç, të dy banues në Fushë Krujë. Sipas policisë, ata u konstatuan në një parcelë ku kishin kultivuar dhjetëra bimë të dyshuara narkotike Cannabis Sativa dhe po përgatiteshin të mbillnin edhe bimë të tjera.
Policia bën me dije se të arrestuarit kanë precedent penal për të njëjtën veprimtari kriminale.
Gjatë operacionit, bimët narkotike të kultivuara u asgjësuan nëpërmjet djegies, ndërsa në terren u evidentuan edhe sipërfaqe të përgatitura për kultivime të tjera.
Materialet procedurale i janë referuar Prokurorisë për veprime të mëtejshme hetimore.
