Trafiku i rënduar është kthyer në makth për të gjithë banorët e Tiranës.
Pothuajse në çdo orë të ditës kryeqyteti është “paralizuar” ndërsa qytetarët duhet të presin me orë të tëra për të përshkruar me makinë distanca të shkurta.
Siç mund të shikoni në hartën më poshtë, jo vetëm zona e qendrës por pothuajse e gjithë unaza e vogël e Tiranës ka ngjyrë të kuqe, çdo rrugicë e bllokuar. Me pak fjalë kaos total në kryeqytet.
Gjithashtu segmente të tjera të bllokuara janë: Rruga e Kavajës, Bulevardi Zogu I, Rruga e Barrikadave të gjitha në hartë siç mund t’i shihni janë me ngjyrë të kuqe.
Përgjegjës për situatën kaotike në Tiranë është policia e kryeqytetit e cila ka dështuar plotësisht nën drejtimin e shefit të ri, Roven Zeka.
Hyrja e Tiranës nga autostrada e Durrësit, nuk bën përjashtim as sot. Prezenca e policëve rrugorë ka qenë e shtuar në disa prej kryqëzimeve më problematike, gjatë gjithë ditës së sotme, por mesa duket, pa i ndihmuar dot situatës.
Sot Tirana i ngjan një kantier të madh ndërtimi, fluks makinash dhe ajër i ndotur. Fatkeqësisht, dita e një qytetari në Tiranë nis me stres e ankth, ku të gjithë vrapojnë për të arritur në orar në destinacionet e tyre, disa të tjerë duhet të dalin një orë para nga shtëpia për të kapur autobusin, pasi metropoli zhytet në kaos trafiku që në orët e para të mëngjesit.
Pavarësisht prezencës së efektivëve të Rrugores në disa prej akseve dhe kryqësimeve kryesore, sërish trafikut nuk i është dhënë zgjidhje.
Lëvizjet e shtuara me rastin e festave të fundvitit duket se kanë ndikuar në rëndimin e trafikut, përveç problemeve ekzistuese si rrugë të ngushta, të amortizuara, mungesë e parkingjeve e të tjera.
Trafiku rëndohet edhe në orët e pasdites, kur qytetarët kthehen nga puna. Një dite të lodhshme, i shtohet edhe trafiku i pamenaxhueshëm nga uniformat blu që lënë në pritje me orë të tëra banorët e kryeqytetit.
