Pas burgosjes së deputetit Ervin Salianji, Partia Demokratike ka marrë vendimin që të radikalizojë aksionin e saj, teksa ka thirrur dhe një protestë kombëtare më 6 Tetor, teksa mbetet për t’u parë se si do të jetë.
Nënkryetari i PD-së Agron Gjekmarkaj i ftuar në emisionin “Kjo Javë”, i pyetur se çfarë pritet të ndodhë në seancën plenare të ditës së hënë, deklaroi se në Kuvend tasshmë nuk do të ketë më paqe. Ai tha se nuk mund të ketë marrëdhënie normale me maxhorancën, e cila sipas tij, kërkon të asgjësojë opozitën.
Gjekmarkaj: Kur institucionet kthehen në bunker dhe nga frëngjitë e tyre lëshohen goditje ndaj opozitës, atëherë jemi shndërruar në autokraci. Opozita po konsiderohet si armike. Ata shfaqen sikur ata duan progresin, sikur ata janë patriotët e ne tradhtarët. Trupi i PS është një organizëm pa shpirt, ku duartrokitet vetëm lideri. PS sot është një parti totalitare. PD nuk mund të ketë më marrëdhënie normale me maxhorancën, sepse PS nuk ofron mundësi bashkëpunimi.
Ne do diskutojmë dhe vendimet do i merrni vesh. Në parlamentin e Shqipërisë nuk do ketë më paqe, kur opozita burgoset për fjalën e lirë. Nuk do ketë asnjë grimcë normaliteti, me ata njerëz që na shohin neve si armiq. Nuk mund t’i dhurosh dorën dikujt që do të të zhdukë. Ne po qëndrojmë deri në fitore, ne nuk do ndalemi.
Gjekmarkaj u shpreh më tej se opozita hyn në një stinë protestash të domosdoshme, ndërsa theksoi se “ne jemi të vetmit që mund t’i kthejmë Shqipërisë normalitetin, garancitë kushtetuese dhe demokratike”.
“Opozita hyn në një stinë protestash kreative dhe të domosdoshme. Do të ketë disa lloje protestash, që kanë qëllim të vetëm; kthimin e zgjedhjeve të lira dhe të ndershme të cilat nuk bëhen me këtë qeveri të drejtuar nga Edi Rama. Pas 12 vitesh Shqipëria ka nevojë për një qeveri teknike. Ne jemi sot zëri i vetëm i vërtetë në Shqipëri dhe po persekutohemi për këtë. Jemi të vetmit që mund t’i kthejmë Shqipërisë normalitetin, garancitë kushtetuese dhe demokratike”.
Sa realisht ndodh qeveria teknike?
Gjekamrkaj: Ne e kemi në dorë një përpjekje që duhet të jetë maksimale, e përditshme. Ne nuk kemi paketë magjike, Edi Rama nëse do të kishte ndërgjegje politike do ta kishte bërë me kohë, ti kishte dhënë vendit zgjedhje të lira, por nuk e ka bërë. Është detyra jonë ti bindim shqiptarët çfarë po ndodh dhe pse quhet qeveria teknike. Shqipëria nuk ka President, nuk ka Parlament, nuk ka institucione të pavarura. Shqipëria ka vjedhje dhe nuk po vjedhim ne, por ata që janë prej 12 vitesh në pushtet.
A e keni strategjinë e duhur për të mobilizuar qytetarët, sepse ka vend dhe për surpriza?
Gjekmarkaj: E duhura nuk ka limit, është e pafundme, por ne do të bëjmë çfarë të jetë e mundur për të bindur këdo që ne nuk e bëjmë për vete. I kam hyrë me një farë idealizmi politikës. Unë dhe kolegë të mi. Sepse shohim se ka arrogancë dhe abuzim kudo. Nuk e meritojnë shqiptarët këtë. Nëse nuk reagohet…nuk është vetëm çështje e opozitës, është e shoqërisë. Opozita bëhet më e mirë nëse shoqëria ngrihet.
