Shkatërrimi i mjedisit natyror dhe vuajtjet e jashtëzakonshme për banorët në Francë dhe Spanjë nga zjarret e mëdha janë biblike.
Zjarret pyjore në Francën jugperëndimore, pranë Bordeaux dhe në Spanjën qendrore dhe lindore kanë çuar në evakuimin e 325,000 njerëzve nga shtëpitë e tyre.
Zjarri i madh në Gironde, në bregdetin francez të Atlantikut, u përhap me shpejtësi gjatë natës dhe deri më tani ka shndërruar në hi 420,000 hektarë tokë dhe 140 ndërtesa. 75 zjarrfikës janë plagosur në operacionet e shuarjes së zjarrit.
Zjarri po digjet tani vetëm 15 kilometra nga zona metropolitane e Bordeaux, por evakuimi i qytetit “nuk është në axhendë”, përsëriti kryebashkiaku i tij, Thomas Cazenave.
Operacioni më i madh i evakuimit të civilëve në kohë paqeje
Zjarri është tashmë ndër më të mëdhenjtë e regjistruar në vend që nga Lufta e Dytë Botërore.
Rajoni i Bordeaux, i famshëm në botë për vreshtat e tij , “ka shumë të ngjarë” të jetë duke kaluar nëpër operacionin më të madh të evakuimit të kryer ndonjëherë në Francë në kohë paqeje, sipas qeverisë franceze. Rreth 220,000 banorë janë evakuuar nga shtëpitë e tyre.
Gjatë natës, u urdhërua një evakuim i ri në disa komuna në zonën metropolitane të Bordeaux, e cila ka një popullsi prej 850,000 banorësh.
“Situata mbetet shumë e pafavorshme” në frontin e zjarreve pyjore në Francë, kryesisht në rajonin e Girondës, por edhe në Landes dhe Var, tha Ministri i Brendshëm Laurent Nunez në një postim në X.
“Në fillim të natës, në Gironde, zjarri u bë jashtëzakonisht i ashpër, i paparashikueshëm, duke krijuar erën e vet dhe duke u përhapur në një mënyrë të paparashikueshme drejt zonës së banimit të Bordeaux”, shpjegoi Ministri i Brendshëm, duke sqaruar se zjarri u qetësua para agimit
18 avionë u vendosën në punë për të luftuar zjarret këtë mëngjes dhe A400M do të operojë përsëri, shtoi ai.
Në Land, fronti tjetër i madh, ku janë djegur 36,000 hektarë tokë, një rigjallërim i zjarrit u trajtua këtë mëngjes me mjete ajrore dhe perimetri i zjarrit mbetet shumë aktiv, shtoi Ministri i Brendshëm francez.
Në total, rreth 4,150 zjarrfikës po punojnë në vijën e parë të frontit të zjarreve. 2,500, përfshirë një ekip zviceran, po operojnë në Gironde, të ndihmuar nga 1,500 ushtarë.
Fronte të tjera zjarri në Francë janë gjithashtu aktive në Francë, si në Korsikë dhe Hautes-Alpes, shtoi Laurent Nunies, duke u bërë thirrje të gjithëve për vigjilencë sa më të madhe, pasi në një periudhë me kushte të pafavorshme moti, pakujdesia më e vogël mund të ketë pasoja tragjike.
Një zjarr pa logjikë dhe drejtim
“Është një zjarr që nuk ka logjikë, nuk ka drejtim. Nuk mund të parashikohet”, shpjegon Guillaume Millet, i Shërbimit të Zjarrfikësve dhe Shpëtimit të Girondës.
“Javën tjetër për fat të keq do të kemi një valë të re të nxehti. Po arrijmë kufijtë e aftësive tona dhe po shkojmë drejt një pamundësie operacionale që po afrohet”, paralajmëroi nënkoloneli David Anotel, zëdhënës i Federatës Kombëtare të Zjarrfikësve, për France Inter.
Zjarr i pandalshëm në dy fronte në Spanjë
Rreth 75,000 njerëz u evakuuan nga shtëpitë e tyre në zonat përreth Madridit dhe në rajonin e Valencias në lindje, ku erërat e forta kërcënojnë ta përhapin zjarrin në jug.
Flakët kanë shkatërruar 250,000 hektarë tokë në perëndim të Madridit.
“Po përballemi me një emergjencë kombëtare që shtrihet nga Komuniteti Autonom i Madridit në provincën e Ávilës (Castilla y León) dhe provincën e Toledos (Castilla-La Mancha), në një front prej 280 kilometrash. Ky është një zjarr gjigant, të cilin i gjithë aparati shtetëror po përpiqet ta përballojë me të gjitha forcat”, tha Sekretarja e Përgjithshme e Mbrojtjes Civile, Virginia Barcones, për televizionin publik spanjoll.
Kryeministri spanjoll Pedro Sanchez bëri thirrje për një “marrëveshje” kombëtare për të adresuar ndikimet e ndryshimeve klimatike dhe paralajmëroi se kohë të vështira po vijnë për vendin, i cili ende po përballet me zjarre të mëdha në zonat përreth Madridit dhe Valencias.
“Orë të vështira na presin, kjo është e sigurt, por informacioni që kemi marrë këtu tregon se nata ishte pozitive për sa i përket zhvillimit të zjarrit, kontrollit të tij dhe operacioneve për t’u përballur me të”, u tha ai gazetarëve gjatë vizitës së tij në zonën e prekur nga zjarri të Avilës.
Kryeministri spanjoll, i cili shpesh bie në konflikt me udhëheqjet lokale konservatore të rajoneve autonome spanjolle, këmbënguli se ekziston nevoja për “një përgjigje të përshtatshme dhe proporcionale me madhësinë e këtyre emergjencave klimatike” dhe shtoi se “të gjitha autoritetet publike në të gjitha nivelet duhet të veprojnë në këtë drejtim”.
Mbreti i Spanjës, Felipe VI, shprehu trishtimin e tij për humbjen e “trashëgimisë natyrore të paçmuar”.
“Disa janë detyruar të braktisin shtëpitë e tyre për katër ditë, të tjerë kanë humbur pronën e tyre dhe të gjithë kemi humbur një trashëgimi natyrore të paçmuar”, tha Mbreti Felipe gjatë vizitës së tij në një strehë të goditur nga zjarri në rajonin e Madridit.
