Deputetja e PD-së, Jorida Tabaku ka reaguar në lidhje me lajmin se Qeveria pritet të rishikojë buxhetin e shtetit për të rritur kostot e disa projekteve për akse rrugore.
Në një postim në rrjetet sociale, Tabaku shkruan se janë tre rrugë që do i rriten kostot me 260 milion euro më shumë se sa projeksioni i marsit të këtij viti dhe që do të paguhen nga xhepat e shqiptarëve.
Deputetja demokrate shprehet se rritja me 71% e kostove vetëm për këto projekte justifikohet nga qeveria se janë rritur kostot e materialeve dhe projektit në tërësi.
Sipas Tabakut, Qeveria pranon se janë rritur kostot për ndërtimin e rrugëve, por nuk pranon se janë rritur çmimet e produkteve që shqiptarët blenë çdo ditë tek marketi apo tregu i vogël i lagjes.
“Qeveria socialiste mendon se Inflacioni ha vetëm të ardhurat e atyre që fitojnë koncesionet dhe PPP-të por jo të portofolit tuaj!” – shkruan Tabaku.
Sipas deputetes, shqiptari blen më shtrenjtë ushqimet, zarzavatet, bukën, qumështin dhe vezën, por për qeverinë halli është si të rrisim buxhetin dhe lekët që marrin nga taksat e larta në xhepin e qytetarëve.
Postimi i plotë i Jorida Tabakut:
Qeveria socialiste pritet të rishohë buxhetin e disa prej projekteve që do të investohen nga paratë e taksave, dmth xhepave të shqiptarëve.
Janë tre rrugë që do i rriten kostot me 260 mln euro më shumë se sa projeksioni i marsit 2024. Përveç diletantizmit, paaftësisë për manaxhim financiar normal e sigurisht dhe shkatërrim të çdo koncepti normal buxhetor, rritja me 71% e kostove vetëm për këto projekte justifikohet nga qeveria se janë rritur kostot e materialeve dhe projektit në tërësi.
Po kostot e jetës së shqiptarëve janë rritur? Qeveria socialiste mohon rritjen e çmimeve për produktet që ju bleni çdo ditë tek marketi apo tregu i vogël në lagjen tuaj. Për qeverinë janë rritur vetëm kostot e ndërtimit të rrugëve, por jo kostot që ju shpenzoni për shtëpinë tuaj. Për qeverinë janë rritur kostot e rrugëve por jo kostot e shërbimeve që ju merrni çdo ditë, të ilaçeve për prindërit dhe gjyshërit ato qeveria mendon se nuk janë rritur.
Qeveria socialiste mendon se Inflacioni ha vetëm të ardhurat e atyre që fitojnë koncesionet dhe PPP-të por jo të portofolit tuaj!
Shqiptari blen më shtrenjtë ushqimet, zarzavatet, bukën, qumështin dhe vezën por për qeverinë halli është si të rrisim buxhetin dhe lekët që marrin nga taksat e larta në xhepin tuaj. Kjo është të mendosh për pakicën që merr tendera dhe të injorosh shumicën që paguan sa frëngu pulën për çdo gjë që blen në treg.
