Shemsi Premçi, ish drejtues policie, komentoi situatën me zjarret në Shqipëri, ku ndër të tjera u shpreh se qeveria shqiptare nuk i ka kushtuar vëmendje reagimit ndaj fatkeqësive të natyrës.
“Në fakt unë kam mbajtur një qëndrim kritik në vazhdimësi për mënyrën e reagimit ndaj fatkeqësive të natyres, po kam qenë kritik edhe kur kam qenë vetë në drejtim të emergjencave civile për faktin se qeveria shqiptare asnjëherë nuk i ka kushtuar vëmendje reagimit ndaj fatkeqësive të natyrës, investimeve, përgatitjes dhe realizimit të detyrave që burojnë nga kuadri SENDAI i Japonisë.
Qeveria shqiptare është treguar indiferente, asnjëherë nuk e ka marrë në analizë, ka zvarritur miratimin e strategjisë për zvogëlimin e rriskut ndaj fatkeqësive të natyrës dhe në mënyrë të veçantë ndaj zjarreve.
Vitet e fundit këmbanat e alarmit për ngrohjen globale që do të kërcënojnë Shqipërinë kanë rënë që shpejt, në 2017-tën ka pasur një numër të konsideruar të zjarreve 940 raste të tilla, të cilat u përballuan në kuadrin e një kontrate paraprake të hartuar në një kompani gjermane, për të cilën unë kam vlerësimet maksimale.
Dhe pse ne ishim të mangët në pikëpamjet e buxhetit dhe fondeve por pilotët gjermanë kanë bërë mrekulli në lidhje me fikjen e zjarreve në Shqipëri, për shpëtimin e banorëve dhe minimizimin e rriskut në zonat e mbrojtura dhe turistike”, tha Premçi per Syri tv.
