SPAK ka dhënë detaje lidhur me operacionin e zhvilluar një ditë më parë, (31 korrik 2024) vijim i operacionit “Plumbi i Artë” ndërmarrë në disa qytete të vendit.
Gjithashtu zbardhet aktiviteti i organizatës kriminale të drejtuar nga vëllezërit Çopja në Elbasan, nga krijimi në 2006, përpjekjet për eliminimin e kundërshtarëve në 2018 dhe investimet e parave të krimit në pasuri të paluajtshme.
SPAK thotë se ndër të tjera dy vëllezërit Çopja kanë porositur 6 vrasje, si dhe janë autorë të grabitjes me armë të ndodhur në pistën e aeroportit “Nënë Tereza”, Rinas, (Tiranë më 9 prill 2019) ku u grabitën 10 milionë euro.
Prokuroria e Posaçme bën me dije se super-grabitja e 10 milion eurove brenda avionit në Rinas mësohet se është planifikuar nga organizata kriminale e drejtuar nga vëllezërit Franc dhe Hajdar Çopja në Elbasan. Atë kohë në aeroportin e Rinasit janë grabitur 7 thasë me para, 5 thasë kanë pasur kartëmonedha valutë ndërsa 2 thasë monedha metalike.
“Fakti Penal “Vjedhja me armë e mbetur në tentativë, në dëm të shtetasit Minella Muçi dhe Vrasja e Punonjësit të Policisë së Shtetit, e mbetur në tentativë, ngjarje e ndodhur më datë 23.03.2018, në lagjen 28 nëntori, në Fier; Fakti Penal “Vjedhja me armë e vlerave monetare” që do transportoheshin me linjën e avionit Tiranë – Vjenë, ngjarje e ndodhur më datë 09.04.2019, në pistën e aeroportit “Nënë Tereza”, Rinas, Tiranë”, thuhet nder te tjera ne njoftimin e SPAK-ut.
Po ashtu është zbardhur dhe vjedhja e mbetur në tentativë ndaj Minella Muçi dhe tentativa për vrasje ndaj një punonjësit të Policisë në Fier. Të dyja këto krime ishin organizuar dhe porositur nga vëllezërit Çopja në Elbasan.
Në kuadër të këtij operacioni me kërkesë të SPAK më 29 korrik 2024 GJKKO lëshoi 33 urdhër-arreste, nga të cilat janë ekzekutuar masat e sigurisë për 13 shtetas ndërkohë që 2 shtetas të tjerë gjenden të arrestuar jashtë Shqipërisë.
Lexo edhe:
33 urdhër-arreste/ SPAK: Goditëm grupin kriminal të “Sakaktit”, sekuestrohen mbi 1 mln euro
