Gjatë fjalës së mbajtur në tubimin e sotëm, kreu i PD-së Sali Berisha foli edhe për përleshjen fizike të regjistruar në mbledhjen e sotme të Këshillit Bashkiak të Tiranës, ku nuk munguan as grushtet.
Berisha tha se kryehajduti, duke iu referuar Veliajt, sot e shndërroi zyrën e kryetarit në arenë përleshjesh dhe agresoi Sekretarin e Përgjithshëm të Partisë së Lirisë, këshilltarin Tedi Blushi.
Lideri demokrat tha se dënon me ashpërsinë më të madhe këtë akt rrugaçërie të tij dhe këshilltarëve të tij dhe i tha se do bëhet përgjegjës për aktin më të vogël të dhunës dhe rrugaçërive ndaj këshilltarëve.
Në lidhjen me thirrjen në SPAK të Arbjan Mazniku, Berisha tha më tej se Veliaj kërkon që të fshihet pas tij, por sipas liderit demokrat është ai përgjegjësi kryesor i inceneratorëve dhe hotelit 20-katësh me 5 yje në Durrës.
Sali Berisha: Miqtë e mi, ditën e enjte është dita e protestës së fuqishme para bashkisë së Tiranës, kundër kryehajdutit të kryeqytetit, Erion Veliajt. Të enjten në ora 11:00, të gjithë tek bashkia. Ky kryehajdut sot e shndërroi zyrën e kryetarit në arenë përleshjesh dhe agresoi Sekretarin e Përgjithshëm të Partisë së Lirisë, këshilltarin Tedi Blushi. Dënoj me ashpërsinë më të madhe këtë akt rrugaçërie të tij dhe këshilltarëve të tij dhe i them se personalisht do bëhesh përgjegjës për aktin më të vogël të dhunës dhe rrugaçërive ndaj këshilltarëve. Miqtë e mi, tani kërkon të fshihet pas Maznikut. Mazniku është një hajdut, e keni parasysh ju Maznikun, Mister Biftekun 1 mijë euro, bashkë me Belindën? Është e vërtetë se ka qenë kryetari i autoritetit kontraktor. Por është e vërtetë se me djegësit është direkt Erion Veliaj. Është e vërtetë se hoteli 20-katësh, me pesë yje në Durrës, sipas punonjësve të ndershëm, është pronë e Erion Veliajt. Prandaj dhe e enjtja është dita në të cilën ne duhet ta nxjerrim për zverku nga bashkia. Dita e ngadhënjimit të qytetarëve. Dita e guximit dhe revoltës qytetare.
