Do të mblidhet sërish ditën e sotme Konferenca e Kryetarëve për të vijuar diskutimes mes mazhorancës dhe opozitës, për të konkretizuar një marrëveshje që do të sillte normalizim e situatës në Kuvend.
Konferenca e Kryetarëve u mlodh ditën e martë dhe ishte planifikuar të mblidhej sërish të nesërmen, por u shty pasi nuk ishte gjetur dakordësia mes palëve për objektin e komisioneve hetimore parlamentare.
“Te nderuar anëtarë të Konferencës së Kryetarëve,
Ju njoftojmë se: Sot datë 15 mars 2024, ora 16.00 do të zhvillohet vijimi i mbledhjes së Konferencës së Kryetarëve.” thuhet në mesazhin drejtuar pjesëmarrësve.
Kujtojmë se në mbledhjen e të martës, mazhoranca pranoi në parim disa prej kërkesave të opozitës, ku një prej tyre ishte edhe ngritja e dy komisioneve hetimore parlamentare. Ai për koncesionet në Shëndetësi dhe për ndërhyrjen në të dhënat personale të sistemit TIMS.
Kështu, mazhoranca tërhiqet nga vendimet e datës 12 Tetor 2023 për rrëzimin e komisionit hetimor për kontratat koncesionare në shëndetësi dhe për komisionin hetimor për ndërhyjen e paligjshme në sistemin TIMS.
Një tjetër pikë për të cilën palët u dakordësuan në parim ishte edhe ngritja e “Nënkomisioneve për Reformat”, për ligjet që kërkojnë shumicë të cilësuar votash. “Nënkomision për Reformat” do të përbëhen nga 4 anëtarë (dy cakton Çuçi dhe dy cakton Bardhi). Në këtë rast, grupimi i Lulzim Bashës, del “jashtë loje”.
Nënkomisioni është përgjegjës për diskutimin/shqyrtimin e paketave ligjore, reformave dhe ligjeve që kërkojnë shumicë të cilësuar apo ligjeve që kërkojnë gjithëpërfshirës, përfshirë ligjet që janë të nevojshme për procesin e integrimit europian. Komisioni merr vendimet me konsensusin e të gjithë anëtarëve (veto) dhe më pas i kalon aktet e dakordësuara për shqyrtim/miratim në seancë plenare.
Ndërkohë, nuk ka patur diskutime në lidhje me bashkëkryetarin e komisionit të posaçëm të reformës zgjedhore, pasi i përfundon mandati më 21 Mars.
Burime për mediat bënë me dije se Gazment Bardhi dhe Klotilda Bushka ishin ligjvënësit e përzgjedhur për t’u marrë me diskutimet për shqyrtimin e objektit dhe ngritjen e këtyre komisioneve hetimore parlamentare të dakordësuar mes palëve.
