Ministri i Brendshëm, Taulant Balla ka bërë me dije se do të ndryshohet ligji për Policinë e Shtetit, ndërsa drafti për pak ditë do të hidhet për konsultim publik.
“Do të ndryshojmë ligjin për Policinë e Shtetit, drafti për pak ditë në konsultim publik. Ligji duhet të na garantojë një polici shteti që i përgjigjet kërkesave dhe pritshmërie të publikut, për ta shndërruar policinë në institucionin më të besueshëm. Të presim dhe pak ditë, është një ligj që edhe sa i përket nr të neneve dhe ndryshimeve, është i madh dhe puna është e rëndësishme”, tha Balla.
Ministri paralajmëroi dhe ndryshime në Kodin Etik, ku tha se duhet të shtohen disa ide novatore.
“Kodi etik ekzistues, pas shumë konsultimesh, mendoj se ka plot ide novatore të cilat na kanë ardhur për t’u përfshirë dhe për të ndaluar kontaktet e papërshtatshme, për të garantuar që punonjësit e policisë, të gardës dhe ato zjarrfikës, ta kenë më të qartë se në ushtrimin e detyrës duhet të garantojnë punë me integritet të lartë. Aleati më i madh i policisë së shtetit është publiku”, tha ai.
Gjithashtu Balla bën me dije se shumë shpejt mes Shqipërisë dhe Emirateve të Bashkuara Arabe, për ekstradimet e personazheve të botës së krimit. Ai tha se pas disa javësh ai do të jetë në Emirate për të konkretizuar këtë marrëveshje.
“Për sa kohë je në kërkim, qoftë në kërkim policor, detyra e policisë është që këta persona të gjenden dhe të vendosen para drejtësisë. Po punojmë me Emiratet te Bashkuara për të pasur një marrëveshje për ekstradim. Pas disa javësh do të jem në Emirate për të finalizuar një marrëveshje që të mundësojë që dhe ky vend të mos jetë më oaz për këta persona të krimit”, tha Balla.
