Nga Boldnews.al
Vangjush Dako plotësonte disa prej kritereve për t’u konsideruar si “peshk i madh”, kur ai u arrestua në Qershor të vitit të kaluar. Dako është një ndërthurje e pushtetit politik dhe ekonomik. Për shumë vite ka mbajtur postin e kryetarit të Bashkisë së Durrësit.
Ai konsiderohej si një prej bashkëpunëtorëve më të ngushtë të kryeministrit Edi Rama. Gjithashtu, ai dhe familja e tij zotëron një pushtet të madh ekonomik, i cili iu fuqizua gjatë mandateve të tij si kryebashkiak. Vangjush Dako njihet gjithashtu edhe si bashkëpunëtor me grupet kriminale të qytetit, të paktën sipas atyre që u zbuluan në dosjen “339”, e cila u sakatua keqazi nga njëra prokurori në tjetrën.
Ndaj, arrestimi i tij në dyshimet për “falsifikim dokumentash” dhe “shpërdorim detyre”, natyrisht që përbënte lajm për këtë vendin tonë, ku ka shumë dyshime se “drejtësia funksion me regji” e regjisori është kreu i qeverisë, Rama. Akuzat e ngritura nga Prokuroria e Posaçme (SPAK) janë fare minimaliste përballë dyshimeve të shumta mbi aktivitetin publik të Dakos.
Gjithësesi, ai u arrestua për dy episode-për dhënien e lejes për një shtesë pallati në vitin 2011 dhe për fryrjen e një fature tenderi për një shëtitore në Durrës. Por, Vangjush Dako nuk qëndroi shumë gjatë në qeli. Të martën e kësaj jave (27 shkurt 2024), Dako u lirua nga qelia dhe tashmë rasti i tij do të ndiqet nën masën e sigurimit “arrest në shtëpi”.
Gjyqtarja e posaçme, Fjorela Davidhi, konstatoi se SPAK-u nuk ka arritur të mbyllë hetimet brenda një periudhe 6-mujore dhe për këtë arsye ishte e detyruar të zbuste masën e sigurimit. Shkak për vonesën në mbylljen e hetimeve ishte mungesa e një ekspertize të kryer nga SPAK-u për të identifikuar dëmin financiar që i ka ardhur buxhetit të shtetit nga veprimet e Dakos.
Ka disa detaje të vogla, të cilat tregojnë se mungesa e vëmendjes së SPAK-ut për të respektuar afatet proceduriale, janë “të çuditshme”. Në mos, është një kalkulim thuajse perfekt. Prokuroria e Posaçme ka njoftuar zyrtarisht se ka nisur hetimet ndaj Vangjush Dakos dhe një dyzine ish-vartësish të tij në Bashkinë e Durrësit në vitin 2020.
Pas tre vite hetimesh, ku presupozohet se prokurori ka kryer të gjithë veprimet e nevojshme proceduriale, përfshirë edhe përllogaritjen e dëmit financiar, u urdhërua arrestimi i Dakos në qershor 2023. Rreth 6 muaj më vonë, në Dhjetor 2023, Prokuroria e Posaçme njoftoi se kishte mbyllur hetimet dhe dërgoi dosjen për gjykim.
Në seancën paraprake, të zhvilluar në 2 shkurt 2024, gjyqtarja e seancës paraprake konstatoi se prokuroria nuk kishte kryer ekspertizë financiare për dëmin ekonomik. Pra, gjatë pothuajse 4 viteve hetime, SPAK-u duket se ka harruar që të mbështesë akuzën ndaj Dakos mbi një ekspertizë profesionale financiare.
Në kushtet e mungesës së këtij akti, gjyqtarja paraprake i dha edhe disa javë kohë prokurorisë së posaçme për të përgatitur këtë ekspertizë. Të martën e kësaj jave, kur ishte caktuar seanca e radhës paraprake ndaj Dakos, Prokuroria sërish nuk ishte në gjendje që të dorëzonte aktin e ekspertizës.
Në këto kushte, referuar parashikimeve ligjore, gjyqtarja konstatoi se Vangjush Dako duhej të lirohej nga qelia, pasi kishin përfunduar afatet e paraburgimit dhe se SPAK-u nuk ka mbyllur hetimet.Zbutja e masës së sigurimit ndaj Vangjush Dakos nuk e liron atë nga përgjegjësia penale, pasi do të pritet përfundimi i procesit gjyqësor.
Megjithatë, akuzat e lehta dhe “harresa proceduriale” e SPAK-ut janë një parathënie se “Vangjush akullorja” mund të dalë i pastër në fund të gjyqit.
