Partia Demokratike ka denoncuar shoqërimet me forcë nga policia ndaj protestuesve një ditë më parë, fill pas mbarimit të protestës para kryeministrisë të thirrur nga opozita.
Në media u publikuan pamje që treguan se si efektivë civilë ndërhyjnë me forcë ndaj protestuesve, duke shoqëruar forcërisht disa prej tyre. Një ditë pas ndërhyrjes së dhunshme, policia e Tiranës konfirmoi arrestimin e 4 të shoqëruarve, ndërsa 6 të tjerë u proceduan penalisht në gjendje të lirë. Në një njoftim zyrtare, policia tha se protestuesit e arrestuar dhe proceduar “ushtruan veprime të dhunshme gjatë protestës së ditës së djeshme, duke hedhur lëndë piroteknike (kapsolla, flakadanë, molotov), në drejtim të punonjësve të Policisë dhe të një institucioni shtetëror (kryeministria)”.
Partia Demokratike ndërkohë ka dënuar dhe cilësuar ekstraligjor përdorimin e forcës nga efektivët e policisë, që i cilëson “banditë me uniformë”.
“Banditët me uniformë duhet të dinë një gjë: Tmerrin e Ramës e Ballës ndaj protestës madhështore nuk duhej ta shfrynin me dhunë ndaj të pafajshmëve. Urdhëruesit do i braktisin siç po i braktis Rama bashkëpunëtorët e tij një e nga një. Do përballen me ligjin dhe demokratët! Asgjë nuk harrohet e sidomos kjo barbari ndaj dy të rinjve të pafajshëm, Z.Andrea Malia e Z.Kindi Toli. Çdo kapërcim ligji do të shpaguhet! Ne nuk e harrojmë këtë dhunë barbarare ndaj njerëzve tanë, që protestuan qytetarisht e paqësisht”, shkruan nënkryetari i PD-së, Flamur Noka në një postim në rrjetet sociale.
Ai publikon edhe pamje të dy të rinjve të përmendur në reagim. Në fytyrat e tyre shfaqen qartazi shenjat e dhunës. Një prej tyre ka nxirrje dhe ënjtje në syrin e majtë, ndërsa tjetri ka dy të çara pranë syrit të djathtë.
View this post on Instagram
