Është duke u mbajtur mbledhja e Konferencës së Kryetarëve në Kryesinë e Kuvendit, ku po shqyrtohet programi 15 janar-23 shkurt.
E pranishme në mbledhje nga opozita është vetëm, Jorida Tabaku, e cila ka shpjeguar se pjesëmarrja është rënë në dakordësi me grupin e PD dhe lidhet vetëm me faktin se do të diskutohet për çështjen e integrimit.
Sa i përket dialogut të opozitës me mazhorancës për Reformën Zgjedhore, deputetja tha se kryeministri Edi Rama ka shpallur monolog për këtë reformë, duke iu referuar deklaratës së tij, se s;mund të vazhdohet më me komisione bipartizane.
“Prezenca ime në Konferencën e Kryetarëve është në dakordësi të plotë me grupin parlamentar të PD dhe opozitën. PD ka qenë dhe do jetë gjithnjë proaktive në çështjen e integrimit Europian. Fatkeqësi që kjo mazhorancë i ka mbetur ende ora tek Reforma në Drejtësi dhe ka dështuar në reformat e tjera. Shqipërisë i duhen reforma për të vazhduar procesin e integrimit. Shqipërisë i duhet një klimë dialogu mes qeverisë dhe opozitë. Jo hipokrizi! Mazhoranca kërkon dialog për Reformën Zgjedhore ndërkohë që Kryeministri dje ka shpallur monolog për reformën zgjedhore. Parlamenti duke refuzuar abuzivisht ngritjen e Komisioneve Hetimore ka goditur demokracinë. Ligji ri për Komisionet Hetimore, në interes të hallit të qeverisë. Sa më shumë komisione aq më shumë skandale dhe aq më shumë hetime nga SPAK. Drejtësia po merret me Korrupsionin, ne na duhet një parlament që të mbajë përgjegjëse qeverinë për angazhimet e saj kundër korrupsionit. Angazhimet për këtë hartë të integrimit nuk duhet të jenë në letra. Janë piketat që duhet të ketë kuvendi për një demokraci parlamentare jo për një parlament noter të dëshirave të qeverisë. Qeveria po bën monolog, miraton një rregullore pa pyetur opozitën. Një qeveri që ka 50% të koncesioneve në SPAK nuk mund të bëj moral për korrupsionin dhe për SPAK. Një mazhorancë që ka mbrojtur koncesionet në SPAK nuk mund të bëjë moral për korrupsionin dhe kundër opozitës”, ka thënë Tabaku.
Ndërkohë, nga ana tjetër, deputetja e Bashës, Flutura Açka ka hedhur akuza se nuk është njoftuar në asnjë formë se sot do të zhvillohej mbledhja e Konferencës së Kryetarëve. Ajo akuzon kryeparlamentaren, Lindita Nikolla se e ka kthyer parlamentin në ngrehinë gaztore.
“Kuvendi i Shqipërisë, kjo ngrehinë gaztore! Zonja Nikolla, Unë nuk jam njoftuar në ASNJË formë e mënyrë që sot Kuvendi ka: Konferencën e Kryetarëve Turp, zonja Nikolla! Keni njē batalion me sekretarë që ju fshijnë edhe këpucët, dhe nuk kanë kohë për një telefonatë zyrtare. E keni kthyer Kuvendin nē një ngrehinë gaztore, ku bëhen shakatë e klanit më korruptiv që ka parë ndonjëherë parlamentarizmi. Të paktën demokratët, por edhe shqiptarët, i kanë shumë qartë bashkëpunimin tuaj më KË opozitar dhe SI bashkëpunon Edi Rama”, shkruan Açka në rrjetet sociale.
