Kol Hysenaj shkarkohet nga detyra me vendim të formës së prerë. Kolegji i Posaçëm i Apelimit shpalli këtë të mërkurë lënien në fuqi të shkarkimit nga detyra të ish-prokurorit të Tiranës.
Trupa gjykuese përbëhej nga Rezarta Schuetz-kryesuese, Albana Shtylla-relatore dhe Ina Rama, Mimoza Tasi e Sokol Çomo – anëtarë.
Kol Hysenaj u shkarkua nga detyra nga Komisioni i Pavarur i Kualifikimit më 19 Prill të vitit 2021. Vendimi erdhi pas dy seancave dëgjimore, ku u konstatuan probleme të shumta pasurinë dhe figurën e ish-prokurorit.
Fillimisht, Kol Hysenaj u përball me vetingun në Shtator 2020, kur KPK i kaloi barrën e provës prokurorit të Tiranës për një sërë problemesh në deklarimin e pasurive – përfshirë mosdeklarimin të kursimeve, të gjendjes ‘cash’ dhe bilance negative në vite që shkonin deri në 26 milion lekë, një raport negativ nga DSIK dhe sqarime për tre denoncime. Në seancën e dytë dëgjimore, në Prill 2021, Komisioni i Pavarur i Kualifikimit konstatoi se nga riçelja e hetimit janë konstatuar sërish probleme për kriterin e pasurisë, ndërkohë që ndaj Hysenajt u depozituan edhe 5 denoncime të reja nga publiku.
Kol Hysenaj ankimoi vendimin, por edhe KPA konstatoi se problematikat ishin shumë të mëdha për ta rikthyer në sistem dhe la në fuqi shkarkimin e tij nga detyra.
Kol Hysenaj është i njohur për shërbimin që i ka bërë pushtetit me dosjen “Gerron Xhafaj”. Ai dhe ish-kolegu i tij Gent Osmani përdorën Fredi Alizotin si dëshmitarë të rremë për të mbrojtur imazhin e ish-ministrit të Brendshëm Fatmir Xhafaj.
Emri i tij ka qenë i lidhur me korrupsionin kohë më parë. Pasi fitoi mandatin e dytë si kryeministër, Edi Rama publikoi një “listë të zezë”, ku përfshihen 100 zyrtarë në poste të ndryshme të akuzuar nga qytetarët për korrupsion. Pjesë e listës ishte edhe Kol Hysenaj. Pas kësaj, ai u shkarkua si drejtues i prokurorisë së Korçës nga kreu i kohës së ish-prokurorisë së Krimeve të Rënda për ta kaluar në akuzën e Tiranës, ku edhe u vu në shërbim në pushtetit në çështjen “Geron Xhafaj”.
