Ndryshimi i rregullores së Kuvendit, që parashikon masa më të ashpra dënimi për deputetët, është futur për votim në seancën plenare të së enjtes. Referuar rendit të seancës parlamentare, Kuvendi parashikon të votojë edhe marrëveshjen Rama-Meloni për refugjatët.
Këtë të martë, socialistët në Këshillin për Rregulloren, Mandatet dhe Imunitetin miratuan projektvendimin për ashpërsimin e masave paralizuese ndaj ligjvënësve, propozim i dy deputetëve socialistë Blerina Gjylameti dhe Toni Gogu.
Toni Gogu saktësoi se ashpërsimi i masave synon pikërisht deputetet e opozitës.
“Toni Gogu gjatë fjalës së tij, nënvizoi se ndryshimet e propozuara kanë si qëllim forcimin e masave disiplinore për të parandaluar aktet e dhunës në parlament pasi prej më shumë se dy muajsh deputetët e opozitës kanë penguar zhvillimin normal të veprimtarisë parlamentare duke cënuar rregullin e zhvillimit të seancave plenare dhe të komisioneve parlamentare. Pas diskutimeve, Këshilli për Rregulloren, Mandatet dhe Imunitetin miratoi në parim, nen për nen dhe në tërësi projektvendimin në fjalë, me ndryshimet e propozuara gjatë mbledhjes”, thuhet në një njoftim nga Kuvendi.
Projektvendimi është futur për votim në seancën e së enjtes, e lajmëruar të nisë në 10:00.
Gjatë së njëjtës seancë, në rendit e ditës është futur dhe marrëveshja Rama-Meloni për refugjatët. Pakti refuzohet nga opozita, që e ka depozituar çështjen në Gjykatën Kushtetuese.
Projektvendimi për ashpërsimin e masave, referuar rendit të ditës së seancë plenare, parashikon miratim me shumicë të thjeshtë – 71 vota, ndërsa pakti për refugjatët kërkon shumicë të theksuar për tu miratuar – 84 vota (ndryshe nga sa ka deklaruar më herët kryeministri Edi Rama, sipas së cilit kërkohej shumicë e thjeshtë).
