Partia Demokratike ka ankimuar në Gjykatën Kushtetuese marrëveshjen Rama-Meloni, që parashikon strehimin në Shqipëri të refugjatëve që kapen nga autoritetet detare italiane në Mesdhe.
Në një prononcim për gazetarët në hyrje të gjykatës, deputetja demokrate Lindita Metalia deklaroi se pret nga GJK cilësimin e marrëveshjes si të papajtueshme me Kushtetutën e vendit dhe pezullimin e saj.
“Kemi mbledhur firmat e më shumë se 28 deputetëve siç e kërkon Kushtetuta të padisë ndaj protokollit të nënshkruar mes qeverisë italiane dhe Këshillit të Ministrave të Republikës së Shqipërisë. Nëpërmjet kësaj padie ne kemi kërkuar deklarimin si të papajtueshëm me Kushtetutën të protokollit ndërmjet qeverisë së Republikës së Italisë dhe Këshillit të ministrave të Shqipërisë që ka të bëjë me protokollin për forcimin e bashkëpunimit në fushën e migracionit. Po ashtu kemi kërkuar dhe pezullimin e procedurave për ratifikimin e protokollit ndërmjet qeverisë së Republikës së Itali dhe Këshillit të Ministrave të Republikës së Shqipërisë”, tha ajo.
Deputetja bëri apel për shqyrtim të shpejtë të çështjes:
“Në cilësinë e deputetes së Lezhës, pa dyshim së bashku me grupin parlamentar, kemi vendosur që kësaj t’i shkojmë deri në fund. Sot, sapo depozituam padinë, sepse ne jemi padyshim në mbrojtje të interesit të qytetarëve, në mbrojtje të të drejtave të njeriut dhe në këto kushte padyshim që presim nga Gjykata Kushtetuese një shqyrtim të shpejtë sipas objektit të padisë që ne depozituam”.
Metalia hodhi akuza ndaj kryeministrit Edi Rama për të cilin tha se po e trajton vendin si pronë të vetën. Po ashtu, deklaroi se ankimi nuk ndikon në raportet dypalëshe me Italinë.
“Kjo ka të bëjë me Edi Ramën, i cili ka vendosur që Shqipërinë dhe shqiptarët ta trajtojë si pronë të vetën dhe ky është një mesazh i qartë që ai nuk mund të vendosë për fatin tonë, në shkelje të të drejtave të njeriut. Ne i jemi vazhdimisht falënderues popullit italian dhe qeverisë italiane, për mbështetjen e përhershme që i ka dhënë Shqipërisë dhe shqiptarëve. Kjo nuk ka të bëjë fare me marrëdhënien tonë me Italinë, përkundrazi do të vijojnë të jenë gjithnjë e më të mira, por ne do të presim vendimin e Gjykatës Kushtetuese duke shpresuar që ta japë sa më shpejt në lidhje me kushtetutshmërinë, pra a pajtohet ky protokoll me Kushtetutën e Shqipërisë”, përfundoi ajo.
Më 6 nëntor, kryeministri i Shqipërisë, Edi Rama, dhe ajo e Italisë, Giorgia Meloni, nënshkruan marrëveshjen, sipas së cilës, Italia do të dërgojë në Shqipëri refugjatët që kap në Detin Mesdhe në një qendër për pritjen e tyre, e planifikuar të ndërtohet në Gjadër të Lezhës. Marrëveshja do të nisë së zbatuari pranverën e vitit të ardhshëm.
Pavarësisht kritikave të shumta, kreu i qeverisë Edi Rama është zotuar se marrëveshja do të kalojë në parlament. Për miratimin e saj, nevojitet shumicë e thjeshtë.
