Partia Socialiste kërkon të ndryshojë rregulloren e parlamentit ku në thelb është ashpërsimi i masave disiplinore ndaj deputetëve, që parashikohet me përjashtime deri në 60 ditë.
Draft-propozimi i publikuara në faqen e Kuvendit vjen pas disa javësh kaosi në seancat plenare dhe kalimin e mbledhjeve të komisioneve online për shkak të protestës së vazhdueshme të opozitës me tymuese dhe tentativash për të bllokuar zhvillimin e tyre normalisht.
Masat e reja disiplinore parashikojnë përjashtim nga punimet e Kuvendit nga 10, 30 apo 60 ditë të një deputeti, ndërkohë që masa më e lartë e parashikuar në rregulloren në fuqi është 10 ditë.
Po ashtu, ngushtësohet mundësia e apelimit të masës dhe mënyra e pezullimit të saj, duke ia lënë vendimmarrjen në dorë shumicës në Byronë Parlamentare. Socialistët janë kujdesur që të parashikojnë me imtësi dhe rastet kur përjashtohen deputetët që duket se lidhen me incidentet e javëve të fundit në Kuvend.
Për shembull masa disiplinore më e rendë “përjashtim deri në 60 ditë” jepet në rastet kur deputeti “përdor lëndë apo mjete piroteknike, tymuese, bojra dhe materiale apo mjete të tjera të ngjashme” dhe “kur bën sjellje që përbëjnë shkeje që konfigurohen si shkelje penale pavarësisht nëse shkelja përbën vepër penale sipas Kodit Penal”.
Deri në 30 ditë përjashtim parashikohet për rastet “kur deputeti përdor dhunë fizike ndaj deputetëve të tjerë, anëtarëve të Këshillit të Ministrave, punonjësve të shërbimit të seancave apo të Gardës së Republikës” dhe “kur dëmton pajisjet dhe orenditë e çdo mjet tjetër logjistik”.
Në Nenin 65/3 bëhen ndryshimet si vijon: 1. Në pikën 4 pas fjalës pezullohet shtohet togëfjalshi “me vendim të ndërmjetëm të Byrosë së Kuvendit, deri në dhënien e vendimit përfundimtar” Në rastet e ankimimit të masës dhe parashikimit të mëparshëm që ajo pezullohej deri në një vendim të Byrosë së Kuvendit, në ndryshimet reja parashikohet që “pezullimi” nuk do të jetë më automatik, por nëse ka një vendim “të ndërmjetëm” të Byrosë deri në dhënien e vendimit përfundimtar për ankimimin.
Kreu i grupit parlamentar të PS-së, Bledi Çuçi tha në një prononcim për gazetarët pas seancës së sotme plenare se “të gjitha parlamentet e BE-së kanë sanksione të forta kur bëhet fjalë për dhunë e pengim ndaj seancave plenare”.
Ndërsa kreu i PD-së, Sali Berisha u shpreh se nisma nuk do ta ndalojë aksionin e deputetëve të opozitës në Kuvend.
“Ai kur ka bërë grusht shteti kundër shtetit dhe merr kopetencat e parlamentit të vetë në dorë, është i aftë të propozojë çdo ligj dhe çdo masë, por promblemi është se mosbindja civile do vazhdojë qoftë edhe me një deputet të vetëm të PD që do mbetet aty, ai do marrë përgjigjen që meriton”, u shpreh Berisha.
