Prej mesditës së djeshme, Shqipëria u përfshi nga stuhia ‘Ciaran’ që tashmë ka goditur pjesën më të madhe të Europës duke shkaktuar dëme të shumta dhe viktima.
Nga veriu në jug të vendit gjithçka është nën “pushtetin” e ujit por kjo nuk e ndal kryeministrin Edi Rama që të falenderojë ekipet në terren për menaxhimin e situatës e cila në realitet ka dalë jashtë kontrollit duke shkaktuar dëme të mëdha.
Gjithashtu Rama në mesazhin e tij iu bën thirrje qytetarëve të shmangin lëvizjet e panevojshme deri në normalizimin e situatës.
‘’Mirënjohje të gjithë ekipeve që kanë punuar pa reshtur gjatë natës për menaxhimin e situatës së krijuar nga moti i rënduar, ndërsa vazhdojnë të jenë në terren në gjithë vendin për parandalimin e pasojave. Një apel edhe ndaj qytetarëve që të shmangin lëvizjet e panevojshme deri në normalizimin e situatës duke shtuar kujdesin’’- shkruan Rama.
E njëjta situatë me stuhi ere të shoqëruar me rrebeshe shiu dhe shtrëngata pritet të vijojë edhe gjatë ditës së sotme (4 nëntor) sipas njoftimit të dhënë nga Shërbimi Meterologjik Ushtarak (SHMU) për vendin tonë.
