Një qytetar i pranishëm në protestën e zhvilluar këtë të enjte ka shpërthyer me akuza të forta ndaj qeverisë, duke denoncuar, mungesën e drejtësisë dhe vështirësitë ekonomike me të cilat përballen shumë familje.
Duke folur nga sheshi “Skënderbej”, përpara nisjes së marshimit drejt Kuvendit, ai tha se prej kohësh kërkon zgjidhje për një çështje gjyqësore, por pretendon se nuk ka marrë përgjigje nga institucionet shtetërore.
“Protestojmë sepse ky shtet dhe ky Parlament i bëjnë ligjet si duan vetë. Nuk respektohen vendimet e gjykatave. U kam shkruar ministrave, deputetëve, gjykatave, madje edhe kryeministrit, por askush nuk më ka kthyer përgjigje. Unë punoj vetëm që t’u siguroj bukën fëmijëve të mi”, u shpreh ai.
Qytetari kritikoi edhe shpenzimet e qeverisë, duke iu referuar financimit të koncertit të Kanye West, ndërsa tha se shumë familje nuk arrijnë të përballojnë as nevojat bazë.
“Unë jetoj me qira dhe nuk kam bukë për fëmijët, ndërsa ata paguajnë 4 milionë euro për një koncert. Në Kombinat nuk ka as kopshte për fëmijët. Kjo është e papranueshme”, deklaroi ai mes të tjerash.
Deklaratat u bënë gjatë grumbullimit të protestuesve në sheshin “Skënderbej”, përpara marshimit drejt Kuvendit, ku qytetarët vijuan protestën kundër qeverisë.
