Ermir Tufa, 31 vjeç, është vënë në pranga këtë të enjte në Krujë, si autori i dyshuar për vrasjen e Shkëlzen Kastratit – ngjarje e ndodhur në vitin 2021.
Ndaj tij, gjykata e Fierit ka caktuar në mungesë masën e sigurisë “arrest në burg”, për veprën penale “Vrasje me paramendim”.
Aksioni për ndalimin e të riut i koduar “Lokalizimi” u krye nga Komisariati i Krujës në bashkëpunim me Forcën e Posaçme të Operacioneve Speciale dhe Kërkimin në DVP Tiranë.
Shkëlzen Kastrati, 40 vjeç u ekzekutua paraditen e 1 shkurtit pranë Rrethit në fshatin Sheq në Fier. Ai u qëllua nga një makinë tip Range Rover, që pas vrasjes u gjet e djegur te Mbikalimi i Baltzës.
Hetimet
Për vrasjen akuzohen në total katër persona, Ermir Tufa, Elson Xheçuka, Silvia alias Roland Cara, dhe Albert Zaja. Ky i fundit është arrestuar dhe dënuar, ndërsa Xheçuka dhe Cara vijojnë të mbeten në kërkim.
Prokuroria e Fierit ka dërguar dosjen në gjykatë pas 15 muaj hetimet, duke akuzuar katër të dyshuarit se vepruan si vrasës me pagesë në ekzekutimin me armë të Shkëlzen Kastratit, por mbetet ende mister personi që financoi vrasjen.
Viktima njihej nga policia lokale si person me precedentë penale, ndërsa vëllai e tij, Klemend Kastrati, në 8 Janar 2016 mbeti i plagosur në një atentat, ku humbi jetën Denis Kasa dhe u plagos Elton Margariti.
