Një autobus urban i linjës Astir-Qendër është përfshirë në një aksident rrugor të ndodhur pasditen e sotme, në kryeqytet.
Siç duket nga pamjet e sjella nga vendngjarja, në incident është përfshirë një automjet dhe autobusi urban “Green Line” i Nadir Çaushollit.
Ngjarja është shënuar në zonën e njohur si kryqëzimi i dy palmave në zonën e Astirit. Burime zyrtare nga policia e Tiranës thanë se nuk ka persona të lënduar, ndërsa shtuan se mes dy mjeteve ka pasur një kontakt të lehtë.
Mjetet e kompanisë së Çaushollit janë bërë shpesh protagonistë të aksidenteve rrugore në rrugët e kryeqytetit. Aksidente që në disa raste kanë qenë me bilanc të rëndë si në persona të lënduar ashtu dhe dëme materiale.
Një prej tyre ishte ai 27 shkurtit në zonën e njohur si “Shallvaret”, ku urbani i linjës së Unazës shkaktoi një aksident masiv, duke përplasur disa makina e duke shkaktuar një duzinë me persona të plagosur. Pamjet e marra nga një kamera sigurie treguan si autobusi me shpejtësi të pazakontë përplasi një mjet tip “Audi” e më tej u shkaktua një aksident zinxhir.
Hetimet nxorën përgjegjës drejtuesin e urbanit i cili u arrestua për veprën penale të shkeljes së qarkullimit rrugor, ndërsa më pas i lirua nga gjykata që zbuti masën. Shefi i trafikut urban në Tiranë, Taulant Gjoka tha pas aksidentit se qëndron hipoteza që drejtuesi i autobusit mund të ketë pasur një patologji fizike.
Aksidenti i Shkurtit i kompanisë së Nadir Caushollit u parapri nga një tjetër ngjarje me disa të plagosur. Në 22 prill 2022, Në 22 prill 2022, një autobus i shoqërisë “Green Line” doli nga rruga dhe përfundoi në skarpatet e lumit Lanë, së bashku me pasagjerët, në zonën e quajtur “Pallatet Agimi”, shumë pranë ish-Bllokut. Të paktën nëntë persona mbetën të lënduar, ndërsa çështja u pushua nga gjykata e Tiranës, pasi të dëmtuarit vendosën të tërhiqeshin nga ankimi.
Të tjera aksidente me bilanc jo kaq të rëndë kanë ndodhur më pas në kryeqytet, me protagonist autobusët e “Green Line”.
