Këshilli Kombëtar i Territorit, i cili drejtohet nga kryeministri Edi Rama, ka miratuar në mbledhjen e fundit lejet për rreth 12 projekte të impanteve të energjisë së rinovueshme, si nga dielli dhe era.
Një prej lejeve të miratuara i përket kompanisë “Dembacaj 2020” sh.p.k., ku aksionet e kompanisë zotërohen 100% nga aktorja Rudina Dembacaj, bashkëshortja e ish-deputetit të PS-së, Mark Frroku, i cili la mandatin pas miratimit të ligjit të dekriminalizimit.
Kompania e Rudina Dembacajt do të ndërtojë një impiant për prodhimin e energjisë me anë të erës në zonën e Kçirës në Pukë.
“Leje Zhvillimi për objektin: “Ndërtimin e impiantit gjenerues të energjisë elektrike eolike, me kapacitet të instaluar 2 MW dhe veprave ndihmëse”, me vendndodhje në zonën e Kçirës, Bashkia Pukë, me subjekt zhvillues shoqërinë “Dembacaj 2020” sh.p.k.” – thuhet në dokumentin e KKT-së.
“Veprimtaria e kësaj Shoqërie do të jetë thellësisht me karakter ekonomik dhe qëllim fitimprurës. Veprimtari në fushën e ndërtimit të përgjithshëm. Veprimtari në fushën e projektimit. Tregtim materialesh ndërtimi, import-export. Ndërtim e shfrytëzim linjash e fabrikash për prodhimin e materialeve të ndërtimit. Shërbim Bar Restorant. Shitje dhe tregtim me pakicë të karburantit, stacion karburanti. Ndërtime të përgjithshme industriale dhe civile, ndërtimi i rrugëve, autostradave, mbikalime, hekurudha, tramvai, metro dhe pista aeroportuale si dhe rikonstruksioni i rrugëve të kategorive të ndyshme. Shtimin e objektit të veprimtarisë së shoqërisë duke përfshirë në veprimtarinë e saj: Rikonstruksion dhe mirëmbajtje godinash civile e industriale, veshje e fasada, punime nëntokësore, ura e vepra arti, diga dhe tunele hidroteknike, ujësjellësa, vajsjellësa, gazsjellësa, vepra kullimi e vaditje, ndërtime detare dhe punime thellimi në ujë, punime dhe mbrojtje lumore, sistemime hidraulike dhe bonifikime, ndërtim i impianteve për prodhimin e energjisë elektrike, ndërtime për nënstacionet, kabinat e transformatorëve, linja e TN të mesëm dhe shpërndarjen e energjisë, punime të inxhinierisë së mjedisit, impiante hidro-sanitare, kuzhina lavanderi, mirëmbajtja e tyre, impiante ngritëse dhe transportues, ashensorë, shkallë lëvizëse, transportues, impiante të sinjalistikës ndricuese të trafikut, sinjalistikë rrugore jo ndricuese, impiante teknologjike termike dhe të kondicionimit, impiante dhe linja telefonie dhe telekomunikacioni, impiante të brendshme, elektrike, telefoni, radiotelefoni, tv, ndërtimi i impianteve të ujit të pijshëm dhe pastrimi i tij, ndërtimi i impianteve të grumbullimit dhe trajtimit të mbetjeve urbane, punime topogjeodezike, shpime gjeologo inxhinierike, puse e shpime për ujë. Rehabilitim dhe rikonstruksion monumente arkitekture të kategorive të ndryshme. Prodhim, tregtim i farave dhe fidanëve. Grumbullim, transportim ruajtje, riciklim, përpunim dhe asgjësim i mbetjeve të llojeve të ndryshme. Marrje dhe dhënie me qira autovetura dhe mjete të tjera. Sidoqoftë, asgjë nuk do të interpretohet këtu si kufizim i mundësisë së shoqërisë për të hyrë në tregje apo aktivitete dhe operacione të tjera tregtare që janë të lidhura me apo në funksion të objektit të mësipërm. Objekti i aktivitetit të Shoqërisë mund të ndryshohet dhe/ose zgjerohet me vendim të Asamblesë së Përgjithshme të Ortakëve, në përputhje me legjislacionin shqiptar në fuqi dhe këtë Statut.” – thuhet në përshkrimin e kompanisë “Dembacaj 2020” sh.p.k., të zotëruar 100% nga Rudina Dembacaj.
Aktorja është pronare dhe e një lokali të njohur në Tiranë.
Vlen të theksohet fakti se nga 56 lejet e miratuara së fundmi nga KKT, 12 prej tyre janë për ndërtimin e kullave të reja në Tiranë, në zona si Liqeni Artificial, Bulevardi i Ri apo ish Blloku, pavarësisht akuzave për betonizimin e kryeqytetit. Plot 320 kate mbi tokë dhe 44 kate nën tokë do të shtohen në kryeqytet me ndërtimin e këtyre kullave.
LEXO EDHE: KKT miraton lejen për 12 kulla në Tiranë, disa mbi 40 kate. Jep “OK” dhe për “Durrës Yacht Marina”
