Studentët e mjekësisë vijuan këtë të hënë bojkotin e mësimit dhe protestën kundër ligjit që ata e cilësojnë “i pengmarrjes së diplomës”, të iniciuar nga qeveria dhe miratuar në muajin Korrik në Kuvend, me votat e mazhorancës.
Fillimisht, studentët u mblodhën para fakultetit të Mjekësisë. Prej, aty, nga megafoni i protestës u bë thirrje për përballje në debat publik me ministren e Arsimit Ogerta Manastirliu dhe dorëheqje të zëvendësministres Albana Tole për shkak të deklaratave të kësaj të fundit. Ajo sugjeroi që studentët të cilët nuk duan të bien pre e shtrëngimit të ligjit të qeverisë të paguajnë tarifën e plotë të studimit dhe nëse nuk kanë mundësi ekonomike, të braktisin studimet.
Prej fakultetit, studentët kanë marshuar drejt ministrisë së Arsimit, ku janë vendosur dhe kanë përsëritur kërkesat e tyre. Ata paralajmëruan vijimin e bojkotit të mësimit dhe protestave në rast të mostërheqjes së ligjit si dhe ankim në Gjykatën Kushtetuese.
Ligji i qeverisë detyron studentët që të punojnë në Shqipëri të paktën tre vite pas diplomimit, ose në të kundërt duhet të paguajnë të plotë tarifën e studimit. Tarifë kjo që për ta është e papërballueshme.
“Kemi shpallur bojkotin për të shprehur kundërshtinë ndaj ligjit që e quajmë të pengmarrjes së diplomave. Kjo është dita e tretë që zhvillojmë protesta përveç bojkotit. Sot nuk ka zhvillim të procesit mësimor as nga studentët e viti të parë. Arsyet kryesore që janë në themel të të drejtave të njeriut, janë që; një student që kryen detyrimet në një fakultet të pajiset me diplomë dhe ne kërkojmë që kjo e drejtë të mos na shkelet. Kostoja 6.7 mln në viti për student e papërballueshme për 99% të familjeve shqiptare. Nuk është zgjedhje reale, por edhe të kishte kosto të përballueshme nuk mund të barazohet më një privat”, u shpreh një prej studentëve të Mjekësisë.
Nisma e qeverisë ka pasur kritika të hershme që prej prezantimit e deri te diskutimet në komisione parlamentare dhe më pas në Kuvend. Opozita është shprehur kundër, duke deklaruar se nisma nuk është zgjidhje efektive dhe përbën shkelje kushtetuese. Zëra të spikatur të opinionit publik po ashtu kanë argumentuar se ligji nuk është një zgjidhje efikase. Qeveria nga ana tjerët pretendon se me këtë ligj shtrëngues do të frenojë emigrimin e bluzave të bardha, që sipas shifrave nga instituciione zyrtare, ka një rritje gjatë viteve të fundit.
