Kryetari i PD-së, Sali Berisha e sheh me skepticizëm hetimin e SPAK për inceneratorët. Ai vijon ti mëshojë qëndrimin se kemi të bëjmë me një hetim me regji që deri më tani ka amnistuar kupolën drejtuee të institucioneve të vendit përgjegjëse për aferën. Këtu ai përmendi kryeministrin Edi Rama, sekretarin e qeverisë Engjëll Agaçi, kryebashkiakun e Tiranës Erion Veliaj, ish-ministrin Damian Gjiknuri, apo edhe kreun e ILD-së Artur Metani.
Në një deklaratë nga selia blu, Berisha tha se prokuroria po tenton ta tjetërsojë thelbin e aferës.
“Së fundmi për të dy zonjat, ish-bashkëshorten dhe bashkëshorten (e Arben Ahmetajt) burime pothuajse mjaft të besueshme më thonë se janë lëshuar urdhër-arreste. Çfarë tingëllon këtu? Të lëshosh urdhër-arresti për ato zonja dhe të sillet Erion Veliaj, Edi Rama, Engjëll Agaçi, Damian Gjiknuri të lirë, të cilët me firmat e tyre janë bazë e kësaj vjedhje, kjo është një akt që dëshmon se përpiqet me çdo kusht ta servirësh çështjen ashtu sikundër nuk është. Përpjekja është kjo: Ahmetaj të paraqitet si truri dhe Mërtiri e Zoto si dy lejtnantët kryesorë të tij. Dhe qarku të mbyllet me këta tre persona. Ky është mashtrimi i shekullit. Unë e them këtë me përgjegjësi absolute. Kam qenë kryeministër. Dhe kurrë një ministër apo pesë ministra s’mund të bindin kryeministrin të shkelmojë ligjin”, tha Berisha.
Ai ngriti dyshime për një marrëveshje të fshehtë të ndodhur së fundmi të Veliajt lidhur me inceneratorin e Tiranës.
“Veliaj 15 dite para zgjedhjeve ka deklaruar se ‘unë do ndërpres pagesat për inceneratorin pas zgjedhjeve’. E ka ndjerë krimin që po kryen. Mirëpo ai këtë se bëri se duket fshehtas arritje marrëveshje që ato të mund të vazhdojnë. Vetëm se ka një ndrysim, s’mund të përdoren më nga Zoto e Mërtiri (pas sekuestrimit), nga aksionerët, por vetëm nga agjencia e ngarkuar për menaxhimin e djegësit”, tha Berisha.
“Veliaj i ka deklaruar këto në enturazhin e tij dhe më kanë ardh pak kohë pasi i ka deklaruar dhe janë 100 përqind të besueshme”, shtoi.
Po ashtu, ai u shpreh se ka informacione se mes segmenteve të SPAK dhe kryeministrit Edi Rama – të cilin e cilëson pronari “de facto” i inceneratorëve – janë zhvilluar takime sekrete.
“Ka presione dhe takime te dyshimta mes prokurorisë dhe pronarëve de facto te djegësve mes të cilëve flitet se edhe Edi Rama, që ka bërë takime të fshehta në zona të caktuara”, tha Berisha.
“Përsa i përket takimeve të zyrtarëve, kërkoj të administrohen të gjitha kamerat dhe të evidentohen të gjithë ata që hyjnë e dalin apo zhvillojnë takime me prokurorët e çështjes. Por, dy informacione janë se një takim i tillë është zhvilluar 10 ditë më parë në kryeministri dhe një tjetër 3-4 ditë më parë diku në periferi. As nuk kam fotografi as kam video se po të kisha do ti nxirrja dhe në mungesë të tyre unë bëj thjesht sinjalizimin publikut se duket që diçka po ndodh”, shtoi.
Berisha kërkoi dorëheqjen e Artur Metanit si kreu i ILD-së, pasi sipas tij, ai mund të ushtrojë presione ndaj prokurorëve për shkak të postit që mban lidhur me hetimin për inceneratorin.
Sekuestrimin e inceneratorit të Tiranës, e quajti “të vonuar”.
