Personat në foto janë Seadet Myftia dhe Zabit Mehmedaj, të shpallurit në kërkim për tritolin e vendosur në banesën e Agim Urajt në Shkodër, një ditë më parë.
Të dy rezultojnë të kenë qenë futbollistë. Seadet Myftia ka luajtur më parë me Tërbunin e Pukës, ndërsa Zabit Mehmedaj është ish-futbollist i Vllaznisë.
Dy 27-vjeçarët janë shpallur në kërkim edhe për ngjarje të tjera kriminale, konfirmoi policia.
Zabit Mehmedaj ishte shpallur në kërkim për sherrin me sende të forta të ndodhur në fillim të Majit në Velipojë.
Policia njoftoi asokohe se Mehmedaj bashkë me dy persona të tjerë, akuzohen se kanosën një 64-vjeçar si dhe e goditën me mjete të forta dhe i dëmtuan automjetin me të cilin lëvizte për shkak të shfrytëzimit të hapësirave në plazh për vendosjen e shezlloneve.
Zabit Mehmedaj është i afërm i Duel Mehmedaj, autor të vrasjes së Ridvan Ramazanit. Ky i fundit u ekzekutua me breshëri kallashnikovi në nëntor të vitit 2020 nga dy vëllezërit Duel Mehmedaj dhe Hydajet Mehmedaj.
