Në një deklaratë për mediat, kreu i Partisë së Lirisë, Ilir Meta është pyetur edhe nëse a do u bashkohet protestave të paralajmëruar nga lideri i PD-së, Sali Berisha për manipulimin e zgjedhjeve të 14 Majit.
Meta tha se do i mbështet aksione të tilla por shtoi se edhe vetë shoqëria duhet të reagojë. Duke nënkuptuar se vetë qytetarët duhet të organizohen në protesta, Meta u shpreh se ky është një proces reflektimi për të gjithë aktorët.
“Opozita duhet të bëjë gjithçka që duhet, po ashtu edhe shoqëria të bëjë gjithçka që duhet në mënyrë që të jetojë me dinjitet të pacënuar nga askush. Ky është proces reflektimi i gjithë aktorëve. Opozita ka bërë protesta, padiskutim që do të bëjë protesta por është shumë e rëndësishme të kuptojmë se edhe vetë shoqëria duhet të reagojë. Të gjithë duhet të bëjnë zgjedhjen e tyre nëse duan të jetojnë si qytetar të lirë të paintimidueshëm që nuk e meritojnë t’u kontrollohet vota as nga shefat e administratës ku punojnë dhe as nga policisë. Ky është një proces i përbashkët dhe besoj do të kemi kohë të gjithë për të reflektuar për këtë proces”– tha Meta.
I ndalur tek situata në veri të Kosovës, Meta tha se i duhet kërkuar Beogradit të nënshkruajë marrëveshjen e Brukselit dhe të Ohrit dhe që të heqë dorë nga strategjia e tensionimit të situatës në veri të Kosovës.
“Ky është një konflikt midis dy modeleve, atij të kapjes së shtetit dhe atij të demokracisë dhe llogaridhënies që kemi sot në Kosovës. Është shumë e rëndësishme që t’i qëndrojmë parimeve dhe ne këtu nuk duhet t’i vendosim më shkopinj në rrota qeverisë së Kosovës. Kemi raste pa fund kur është bërë e kundërta duke e vendosur Kosovën në një pozicion që ajo s’e meriton aspak kur dihet shumë mirë se kush është orkestruesi i largimit të serbëve institucionet…”, tha ndër të tjera Meta.
