Nga Boldnews.al
Gjergj Luca vijon të përfitojë nga qeveria prona shtetërore me qera simbolike, me qëllim shfrytëzimin për qëllime biznesi. Këtë të Mërkurë, Këshilli i Ministrave ka miratuar dhënien me qera për 1 euro të ish-repartit ushtarak në Çekrez të Gramshit, kompanisë që ai zotëron – “Rozafa” sh.p.k.
Referuar vendimit, kontrata mes kompanisë së biznesmenit pranë kryeministrit Edi Rama dhe Ministrisë së Financave parashikon që toka në pronësi të Ministrisë së Mbrojtjes ti jepet kompanisë së Lucës për shfrytëzim disavjeçar. Vendimi i firmosur nga kryeministri Edi Rama është propozuar nga Ministrja e Financave Delina Ibrahimaj, thuhet në vendimin e qeverisë.
Për lejen e shfrytëzimit të kësaj prone shtetërore nga firma e Gjergj Lucës qeveria ka marrë edhe vendime të mëparshme, të cilat zbuloje se kontrata mes “Rozafas” dhe Ministrisë së Financave është 20-vjeçare. Po ashtu, saktësohet se ish-reparti që do të jepet me qira simbolike ka një sipërfaqe prej 28 960 m².
Sipas të dhënave të databazës së “OpenCorporates”, “Rozafa” ka përfituar një sërë kontratash të ngjashme që prej vitit 2015, duke i lejuar Gjergj Lucës që me firmën e Edi Ramës të zgjerojë bizneset. Kompania nën zotërimin e tij ka përfituar sipërfaqe të konsiderueshme toke në pronësi të shtetit për shfrytëzim shumëvjeçar në Elbasan, Maliq, Përrenjas e tanimë edhe në Gramsh.
Gjergj Luca ka shprehu publikisht mbështetje për politika të shumëdebatuara të qeverisë Rama. Ndërsa ky i fundit ka zgjedhur bizneset e tij për aktivitete të ndryshme.
Nga opozita ndërkohë, ka pasur herë pas here denoncime në adresë të biznesmenit mik me Ramën për aktivitete të jashtëligjshme.
