Një konflikt me protagonistë dy pronar biznesesh është regjistruar paraditen e kësaj të marte në qytetin e Elbasanit. Ngjarja ka ndodhur në portën hyrëse të lagjes “Kala” ku ndodhen pranë njëri- tjetrit dy bizneset, njëri i hapur rishtaz ditët e fundit.
Mësohet se debati fillimisht ka nisur në dhunë verbale, duke degraduar më pas në përleshje fizike mes tyre.
Burime mediatike bëjnë me dije se konflikti ka nisur për shkak të marrjes së klientelës.
Si pasojë e konfliktit ka mbetur i plagosur njëri prej pronarëve, i cili është duke marrë mjekimin e nevojshëm në spitalin e Elbasanit.
Policia ka shoqëruar një prej personave dhe në vijim pritet të marrë dëshmitë e tyre mbi shkaqet e konfliktit që gjeneroi në përdorimin e dhunës fizike.
