“Manipulimi i zgjedhjeve të 14 Majit”, është kryefjala e ditëve të fundit dhe artikulimi më i shpeshtë që bëhet nga kreu i Partisë Demokratike, Sali Berisha.
Mbrëmjen e sotme, Berisha deklaroi se ditën e 14 majit, rreth 160 mijë votues kishin shkuar në qendrat e votimit larg vendbanimeve ku ishin emrat e tyre dhe nuk kishin arritur të votonin duke u kthyer pas, gjë që e cilësoi si një vepër të kryeministrit Edi Rama dhe ministrit të Brendshëm Bledi Çuçi.
Berisha tha se kjo ishte “skema” e radhës e Ramës për të manipuluar zgjedhjet.
“Eurostat thotë se në 8 vitet e fundit kanë ikur 937 mijë shqiptarë drejt zonës së Shengenit. Të mendosh se janë në Shqipëri 2 milionë zgjedhës nuk ka irrealizëm më të madh. Ato shifra i jep një njeri që jeton në kompjuterin e tij dhe u thotë shqiptarëve që s’kanë votuar 700 mijë shqiptarë. se nuk dua ta fyej. A votuan 1.4 milionë. Të marrim dhe 700 shkon 2.1, të marrim dhe 900 mijë që kanë ikur, sa shkojnë? Për herë të parë pas vitit 2001 u përdor ndryshimi i adresave. 1.3 milionë zgjedhës ndryshuan adresën, disa prej tyre në vende fqinje. Ne e kemi konstatuar dhe e kemi çuar në SKAP. Edi Rama dhe Çuçi kishin skemën e përjashtimit të mijërave nga votimit. Atë ditë ndodhi që 160 mijë shkuan të votojnë dhe nuk votuan. Shkoi në Prrenjas kur e kishte në Tiranë, e kishin në Tropojë e me radhë. Ky ishte mekanizmi. Kjo praktikë manipulimi u përdor në vitin 2001. Kur gjetëm se 1.3 mln vetëve iu ndryshua qendra e votimit, Rama dhe Çuçi refuzuan të rikthejnë listat si ishin”, tha fillimisht Berisha gjatë intervistës për News24.
Sakaq, Berisha u kthye pas te zgjedhjet e vitit 2021, duke thënë se opozita asokohe u mor me karrigen dhe shikonte si të qeveriste me Edi Ramën e të dilte kundër Berishës.
“Opozita ka marrë 40% të votave se 100 mijë vota i mori logoja. Ky është deformimi absolut. Është grabitje e mandateve. Nëse në 2021 do bëhej ky proces dhe opozita do ngrihej në të drejtën e saj Rama nuk do guxonte kurrë të çonte zarfe në mes të fushatës. Por opozita asokohe u mor me karrigen dhe shikonte si të qeveriste me Edi Ramën dhe shikonte si të dilte kundër Sali Berishës. Votën nuk e mbroj me armë. Po e mbroj votën dhe të jeni të bindur se po punojmë. Opozita nuk ka fituar, por as ai nuk ka fituar. Ai e ka blerë fitoren. 100% është blerë në Durrës e Elbasan. Kam thënë para 3 muajsh që zgjedhje me Ramën nuk ka”, u shpreh Berisha.
- Berisha për ambasadorët: Nuk kam problem me ta, kauza jonë është e qartë
Kryetari i PD-sëm Sali Berisha foli edhe për bllokimin që i kanë bërë ambasadorët. Ai tha se nuk ka asnjë punë me ambasadorët dhe se ka bindjen që faktet e opozitës do të merren parasysh.
“Ne kemi fillim të mbarë tani. Raporti i OSBE/ODIHR tani nuk është plotësisht në anën e qeverisë”, tha Berisha.
Ndërkohë ai foli edhe për mënyrën sesi do të ngrejë popullin në mosbindje civile. Sipas Berishës, ajo që do të nxjerrë popullin në rrugë është kauza që do I ofrojmë.
Qeveria, tha ai dërgoi me zarf tek pensionistët 33 milion euro, dhe 40 milion euro në drejtim tjetër. Më tej ai tha se 510 mijë qytetarë i dhanë votën dhe kjo është një mbështetje e madhe. Berisha tha se u fut në zgjedhje pa logo dhe pa sigël.
