Ish kryeministri Sali Berisha, po zhvillon mesditën e kësaj të Premte një takim elektoral me mbështetësit në Dibër.
Gjatë fjalës së tij para të pranishmëve, Berisha deklaroi se kreu i qeverisë Edi Rama do të largohet nga detyra me ceremoni, ndërsa u shpreh se në 10 vitet e fundit, Rama ka inauguruar 5 herë rrugën e Arbrit dhe nuk e ka përfunduar asnjëherë.
Ai shpjegoi se socialistët bënë një gabim gjatë punës së tyre duke bërë shpimin aty ku kompania kishte këshilluar të mos bëhej dhe sot jemi në këtë pikë ku rruga ende nuk quhet e përfunduar.
Berisha: E inauguroi 5 herë gjatë këtyre viteve dhe asnjëherë nuk përfundoi. Rruga e Arbrit ishte shpallur nga qeveria e mëparshme, rruga e dytë e kombit dhe ajo e tillë është dhe do të jetë. Ajo afron Shkupin me Tiranën dhe ishte shpallur rruga e dytë e Kombit. Edi Rama vazhdon prej 10 vitesh me 5 inaugurime dhe 5 mashtrime. Mund të ketë pasur nga ju me të drejtë që mund të kenë thënë: Pse e ndërpreve Sali, pse nuk e vazhdove. Projekti ishte i pamundur sepse do të dilte dhe dhe ujë. Ne e ndërpremë, vendosëm të spostojmë tunelin në kuotën në të cilën na këshilloi kompania e konsulencës. Ne do e kishim baruar tre herë. Shkuan dhe e shpuan aty ku kompania na tha se aty nuk shpohet. Ndaj edhe tani ecën siç po ecën.
Dibra do të ketë me Ismail Ukën ndryshimin më të madh. Ju garantoj se Ismail Uka me të gjithë dashurinë e tij për ju dhe Dibrën do bëjë gjithçka të ndryshojë jetën tuaj me taksa të ulëta me mbështetje për biznesin dhe fermerët. Pas fitores më 14 Maj Edi Rama do të largohet me ceremoni. Nga njëra anë e pret zemërimi i madh i kombit shqiptar në anën tjetër e pret tradhtari i kombit amerikan, McGonigal sepse ka dhënë ryshfetin dhe drejtësia amerikane do e ndjekë deri ditën e fundit të ditës së jetës”.
