Një autobus i kompanisë “Green Line” me pronar Nadir Caushollin është përfshirë në një aksident në kryeqytet, mbrëmjen e sotme.
Përplasja u shënua në zonën e Astirit – në zonën e njohur si “dy rotondot”, ndërsa pamjet nga vendngjarja tregojnë situatën me trafikun e rënduar. Faqja “JOQ” në rrjetet sociale që publikoi pamjet, citon një dëshmitar i cili shprehet se drejtuesi i mjetit të linjës urbane të Yzberishtit kreu manovrën e futjes në rreth-rrotullim me shpejtësi dhe u aksidentua me një automjet tjetër.
“Mallkimi i Veliajt”/ Aksidentohet një tjetër autobus jeshil “Green Line” në Tiranë pic.twitter.com/ROrkzTadKm
— JOQ Albania (@JoqAlbania) March 21, 2023
E pyetur nga Boldnews.al, policia e Tiranës tha se nga informacionet e deritanishme nuk ka persona të plagosur, megjithëse urbani ka qenë me pasagjerë kur ka ndodhur përplasja.
Një sërë aksidentesh ku të përfshirë janë qenë autobusët urbanë janë shënuar në Tiranë vitet e fundit. Ata të linjës “Green Line” kanë qenë protagonistë të ngjarjeve më të rënda duke shkaktuar dhjetëra të plagosur.
Në 27 Shkurt, në zonën e njohur si “Shallvaret”, urbani i linjës së Unazës shkaktoi një aksident masiv, duke përplasur disa makina e duke shkaktuar një duzinë me persona të plagosur. Pamjet e marra nga një kamera sigurie treguan si autobusi me shpejtësi të pazakontë përplasi një mjet tip “Audi” e më tej u shkaktua një aksident zinxhir.
Hetimet paraprake nxorën përgjegjës drejtuesin e urbanit i cili u arrestua për veprën penale të shkeljes së qarkullimit rrugor. Shefi i trafikut urban në Tiranë, Taulant Gjoka tha pas aksidentit se qëndron hipoteza që drejtuesi i autobusit (i cili pas arrestimit u lirua nga gjykata e Tiranës që caktoi ndaj tij masën e sigurisë së arrestit me burg) mund të ketë pasur një patologji fizike.
Aksidenti i Shkurtit i kompanisë së Nadir Caushollit u parapri nga një tjetër ngjarje me disa të plagosur. Në 22 prill 2022, Në 22 prill 2022, një autobus i shoqërisë “Green Line” doli nga rruga dhe përfundoi në skarpatet e lumit Lanë, së bashku me pasagjerët, në zonën e quajtur “Pallatet Agimi”, shumë pranë ish-Bllokut. Të paktën nëntë persona mbetën të lënduar, ndërsa çështja u pushua nga gjykata e Tiranës, pasi të dëmtuarit vendosën të tërhiqeshin nga ankimi.
