Për rreth dy orë zgjati protesta e thirrur nga kryedemokrati Sali Berisha para kryeministrisë. Pjesëmarrja ishte masive, ndërsa protesta u zhvillua pa incidente.
Organizimi u zhvillua i ngjashëm me protesta të mëparshme. Në një podium të ngritur enkas u mbajtën fjalime. Mes folësve ishte dhe kreu PL-së Ilir Meta dhe kryetari i PD-së Sali Berisha. Të dy akuzuan kreun e qeverisë Edi Rama se po tenton të pengojë Partinë Demokratike të marrë pjesë në zgjedhjet lokale, me ndërhyrje në procesin gjyqësor për vulën e PD-së – çështje që po shqyrtohet këtë të Premte në Apel.
Por, si Meta ashtu dhe Berisha u zotuan se Edi Rama do të largohet nga pushteti.
“Edi Rama, ne do të përjashtojmë nga Shqipëria”, theksoi Berisha gjatë fjalës së tij, me përfundimin e së cilës, nisi dhe shpërndarja e protestuesve.
Të tjerë folës në podiumin e protestës ishin dhe aktivisti e gazetari Aulon Kalaja, Sekretari i Përgjithshëm i FRPD-së Grigels Muçollari, kandidati i PD për Bashkinë Vorë Hysni Sharra, deputeti Flamur Noka, Sekretarja për Marrëdhëniet me Publikun pranë PD Jola Hysa, si dhe anëtarja e FRPD-së Klea Vukaj.
Kjo e fundit u ndje keq teksa mbante fjalimin në foltoren e protestës dhe përfundoi në spital për të marrë ndihmë mjekësore.
Mesazhet e protestuesve
Mesazhe të tjera nga protestuesit u shprehën edhe përmes mikrofonit të mediave. Kryefjalë e kërkesave të tyre ishte largimi i Ramës nga drejtimi i qeverisë.
Mesazhet me pankarta, shumë prej tyre në anglisht, ishin po ashtu një tjetër mënyrë se si protestuesit zgjodhën të përçonin zërin e tyre.
“Rama na varfëroi, qeveri hajdute”, ishte mesazhi që lexohej në teshat e një protestuesve.
“Soros, vrasës serial i demokracive, Albania one party state, enough is enough, 1 milion albanians left, what is Rama doing here, we want to join Eu, not by boat. Të ikur 937 mijë – vite 10”, shkruhej në pankartat e qytetarëve.
Dy manekinë me fotot e kryeministrit Edi Rama dhe ish-shefit të FBI-së Charles McGonigal, dhe rroba të ngjashme me ato që veshin të burgosur, ishin po ashtu pjesë e protestës..
Manekinëve u tentua ti vihej flaka, ndërsa me përfundimin e protestës përfunduan në kosh.