Policia e Shtetit ka bërë publik planin e masave të marra në kuadër të tubimit që do të zhvillohet ditën e nesërme i thirrur nga kreu i Partisë Demokratike, Sali Berisha duke filluar nga ora 12:00 përballë Kryeministrisë.
“Blutë” bëjnë me dije se me qëllim garantimin e rendit dhe sigurisë, para, gjatë dhe pas përfundimit të tubimit që do të zhvillohet në datën 03.03.2023, në orën 12:00, në bulevardin “Dëshmorët e Kombit”, në Tiranë, do të angazhojë shërbimet e Policisë, për bllokimin e qarkullimit në disa segmente rrugore, si dhe për bllokimin e pjesshëm të qarkullimit në disa segmente të tjera rrugore.
Parkimi prej mëngjesit nuk do të lejohet në rrugës: Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i Rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
Gjithashtu, në këto rrugë, do të bllokohet qarkullimi i automjeteve, nga ora 10:00 e datës 03.03.2023 deri në përfundim të tubimit.
- Berisha: Protesta e jashtëzakonshme për ta larguar Ramën
Ish-kryeministri Sali Berisha u shpreh para mediave se protesta e nesërme pritet të jetë madhështore, pasi sipas tij qytetarët e shohin që kanë të bëjnë “me një kufomë që duhet ta largojnë sa më parë”, referuar këtu kryeministrit Rama.
“Madhështore e jashtëzakonshme, qytetarët e shohin se kanë të bëjmë me një kufomë të pakallur që përbën rrezik për vendin dhe shoqërinë që duhet ta largojmë sa më parë. Nuk kam asnjë lloj arsye që unë të ndërhyj në vendimin e gjykatësve e them me bindje që nuk ka gjykatës që të pranoj palë atë që nuk është. Komisioni është jetik për të zbardhur këtë aferë. Për mua ka rëndësi tu them ju këtu se atë që Edi Rama ndaj SHBA mund ta bënte vetëm Lukashenko ose Putini as Vuçiçi se do ndruhej”, tha Berisha.
- Protesta e opozitës më 3 mars
Gjithashtu Berisha foli edhe për protestën e cila përkon me datën kur Gjykata do të vendosë për “vulën” e Partisë Demokratike. Në fjalën e tij, Berisha tha se protesta e nesërme s’ka lidhje me vendimin e gjykatës për fatin e PD, ndërsa shtoi i bindur se asnjë gjykatës nuk mund të pranojë palë atë që nuk është palë në proces.
“Ajo protesta nesër s’ka lidhje me vendimin e Gjykatës. Unë nuk të paragjykoj një vendim i cili nuk egziston. Nuk egziston asnjë bazë ligjore për të shpallur palë atë që s’është palë. Unë kam besim. Askush s’e bën palë atë që sështë palë. Vetëm gjyqtarja Blerina Muçi e bën këtë”, vijoi Berisha.
